Көшкүн чоннарның кышкы дош байырлалынга тураскааткан ча адар оюну Улан-Батор хоорайга болуп эрткенин Тыва үндезин культура төвү дыңнаткан.
Моол күрүнениң Улан-Батор хоорайынга улуг делегей чергелиг «Көшкүн чоннарның кышкы дош байырлалы» болуп эрткен. Ук байырлалдың бир кезээ – көшкүн чоннарның культуразында ханы сиңген эр кижиниң иштики сагыш-сеткилин сайзырадыр, дадыктырар болгаш хей-аът киирер мөөрейлерниң бирээзи ча адар оюн болуп эрткен.
Мөөрейниң түңнелдери-биле Уранхай ча адарынга спорт мастери деп хүндүлүг атка төлептиг болган Олег Чанчып база кандидат мастери деп бедик атты Ооржак Чадан-Кат чаалап алган.
Тыва үндезин культура төвү мерген адыгжыларны деткип, делегей чергелиг байырлалга киржиринге материалдыг дузаны чедиргени дээш Тываның спорт сайыды Субудай Монгушка четтиргенин илереткен.
Ук мөөрейге киржири-биле Тыва культура төвү дараазында багжыларны аъткарган: Андрей Монгуш, Артыш Монгуш, Эрес Нурзат, Айдың Хомушку, Сылдыс Монгуш, Кежик Успун, Артыш Мортуй-оол, Олег Чанчып, Чадан-Кат Ооржак, Алдын Доктугу, Александр Ооржак, Сылдыс Ооржак, Арсен Монгуш база Омак Донгак.
Тыва чоннуң эрткен төөгүзүнүң изин салбайн, эр кижиниң үш оюннарының бирээзи, тыва ча адар оюннуң сайзыралынга улуг үлүг-хуузун киирип чоруур багжыларывыска делегей чергелиг байырлалга чедиишкинниг киришкенинге төп байырын чедирген.
