Чагытай хөлдүң чоогунда Чеди-Хөл кожуунга хамааржыр “Металлург” лагериниң баазазында тургускан майгын лагери уругларны хүлээп эгелээрин кожууннуң чагырга чериниң даргазы Адыгжы Араптан дыңнаткан.
– Тываның Чазаа ийи улуг майгын, орун-дөжек херекселдери дээш уругларга таарымчалыг байдалды тургузарынга оон-даа өске херек чүүлдер садарынга бир сая ажыг акшаны аңгылап үндүрген. Бир майгында 18 орун бар.
Бо неделяда республиканың арыг агаарлыг, чараш бойдус чурумалдыг черинге 36 уруг солун болгаш ажыктыг дыштанып эгелээр. Майгын лагериниң ажыттынганының ачызында чайгы кадыкшыдылга кампаниязынче хаара туттунган уругларның саны көвүдээн.
Чылдың-на лагерьниң септелгезин чорудуп, материал-техниктиг баазазын чаартып турар бис. Ажылдар уламчылап турар – деп, чагырга чериниң даргазы демдеглээн.
“Металлург” пионер лагерин совет үеде Хову-Аксы суурга ажыттынган “Тывакобальт” комбинат туткан. Аңаа комбинаттың ажылдакчыларының уруглары халас дыштанып турганнар.
Уругларның дыштаныр чери 1971 чылда ажыттынган. Бежен үш чылдың дургузунда лагерьде Чеди-Хөлдүң болгаш республиканың аңгы-аңны булуңнарындан уруглар дыштанып турар.
