Россияның Чазааның Даргазы Михаил Мишустин Тывага ажыл албан аайы-биле сургакчылаашкынының үезинде, республиканың консультация-диагностика төвүнге кээп чорда, Тываның Баштыңы Владислав Ховалыг эде чаартылга программазы-биле чүү кылдынганын илеткээн.
Михаил Мишустин Тываның кадык камгалал системазында эде чаартылгаларның түңнелдерин «Кайгамчыктыг үре-түңнелдер» – деп, тайылбырлаан.
ТР-ниң кадык камгалал сайыды Анатолий Югай аарыгның баштайгы демдектери көстүп келирге-ле дуза дилээр, чонга кол болгаш эң чоок баштайгы эмнелге чадазында өскерлиишкиннерни хүндүлүг аалчыларга таныштырган. Чижээ, чаартылга үезинде 21 объектиге улуг септелгени кылып, 12 эмнелге амбулаторияларын база 61 фельдшер-акушер пунктуларын туткан. Республика эмнелге албан черлеринге амгы үениң 700 ажыг санныг дериг-херекселин, 85 автомашинаны, көжүп чоруур 18 фельдшер-акушер пунктузун база беш диагностика комплекстерин садып алган.
Кадык камгалал адырында чурагай ажыглалын чедип алыр дээш, идепкейлиг ажыл чоруп турар. Электроннуг эмчи карталары тыптып келген. Күрүне ачы-дузаларының порталы таварыштыр эмчиниң шинчилелдерин азы бижиктерин алыры чиик апарган. Телемедицина, кылымал угаанны ажыглаан ачы-дузаны сайгарарынга дузалап турар. Чурттакчы чон мессенджерлер таварыштыр эмчиниң хүлээп алыышкынынга бижидип алыры медицинаның чедингирин бедиткен.
Инфратургузугну экижиткени, эмчилерниң чаа технологияларны шиңгээдип турары кадыкшыл көргүзүглеринге дорт салдарлыг болган. Чижээ, 5 чыл дургузунда чаштарның өлүп-хораары 37,5 хуу кызырылган, бажынче хан чүгүргеш азы чартыктааш чок болур чоруктар база эвээжээн. Хоралыг ыжык аарыгларын тиилеп үнери көвүдээн. Тускай шериг операциязының киржикчилеринге дуза чедирер системаны тургускан.
Кадык камгалал системазын амгы үениң негелделеринге дүүштүрер ажылдар уламчылап турар. Оон ыңай кадык камгалалының 20 объектизин чаартыры, уруглар поликлиникаларынга 270 ажыг дериг-херекселди садары планнаттынган. 2029 чылда республиканың уруглар эмнелгезиниң чаа тудуун ажыглалче киирер, ынчалдыр амгы 879 орунга 50 орун немежир.
«Он чыл дургузунда септелге херек черлер саны 1,6 катап эвээжеп, шупту эмнелге албан черлерин чурумчутканы эң кол. Кайгамчык үре-түңнел. Кадык камгалалын ам-даа сайзырадыр херек» – деп, Михаил Мишустин Тываның Баштыңы Владислав Ховалыгга чагыын берген.
