Тыва үндезин культура төвүнге Моол күрүнениң Баян-Өлгий аймактың Ценгел сумузундан Иргит Папизан уруу Амархуу-биле ужуражылга болуп эрткенин төп дыңнаткан. Ук ужуражылгага Тываның күрүне университединиң төөгү факультединиң сургуулдары болгаш төптүң ажылдакчылары киришкеннер.
Иргит Папизан дээрге – Ценгел тывазы, Моол күрүнениң болгаш Баян-Өлгий аймактың сураглыг хөөмейжизи, хөгжүм шинчилекчизи чораан кижи. Бистиң улуг назылыг хөөмейжилеривис Геннадий Тумат, Коңгар-оол Ондар, Кайгал-оол Ховалыг олар Иргит Папизан-биле арга-дуржулгазын солчуп, кады ажылдап чорааннар.
Ужуражылганың эгезинде ТКУ-ниң төөгү факультединиң башкызы Елена Айыжы Иргит Папизан уруу Амархууну таныштырган. Папизан уруу Амархуу Баян-Өлгий аймактың Ценгел сумузунга төрүттүнген. Амгы үеде ол Ховд (Копту) аймакта чурттап чоруур.
Сургуулдар боттарының сонуургаан айтырыгларын тус-тузунда Амархууга салып, Ценгел тываларының езу-чаңчылдарының, амыдырал-чуртталгазының, дыл-домааның байдалының дугайында солун чүүлдерни билип алганнар.
Тыва үндезин культура төвүнүң ажылдакчылары база Амархуудан айтырыгларын салып, чугаалажып, келир үеде кады ажылдажылгазының болгаш сорулгаларының дугайында дугурушканнар.
