Эрткен чылын Тыва үндезин культура төвү Моол күрүнениң Баян-Өлгий аймактың Цэнгэл сумузунуң культура адыры-биле дугуржулга солчур дугайында керээни чарып алганын төп дыңнаткан.
Дугуржулганың түңнелинде Тыва үндезин культура төвү Цэнгэлде чурттап чоруур аныяк өскенге тыва улустуң сагыш-сеткилиниң эртинези – хөөмей-сыгытты, чаңчылчаан хөгжүм херекселдеринге ойнап өөренир болгаш ооң кылырының технологиязын ырак черде амыдырап чоруур тыва чонунга өөредип, база ол ышкаш бөлгүм ажыдып, ук угланыышкынныг ажыл-үүлеге үлүүн кадар болган.
Ук сорулганы боттандырар дээш Чаа чылдың башкы айында Улуг Тыва чуртундан төлээлеп, тыва улустуң езу-чаңчылдар, аас чогаал болгаш ус-шеверлер төвүнүң даргазы Игорь Көшкендей ажылдакчылары-биле Моол күрүнеде арга-дуржулга солчуп чеде бергеннер.
