«Сүбедей» спорт ордузунга болуп эрткен «Спортчу элита-2024» деп хемчегге Моол күрүнеде чурттап турар Ганзориг Чимеддорж база Бямбажав Хуху тыва ча адар оюнну катап «диргизеринге» улуг үлүг-хуузун кииргени дээш шаңнатканын Тыва үндезин культура төвү дыңнаткан.
Өгбелеривистен дамчып келген ожуктуң үш дажы дег, чарлып болбас тыва эр кижиниң үш оюнунуң бирээзи – тыва чаның сайзыралынга боттуг дузаны көргүскенин Тываның Баштыңы болгаш спорт сайыды бедии-биле үнелээн.
Тыва үндезин культура төптүң даргазы Игорь Көшкендей байыр чедириишкиннеринге каттышкан.
– Тыва үндезин культура төвү он чыл бурунгаар тыва ча адар оюнну катап оттурар сорулга-биле Моол күрүнениң мерген адыгжызы Хуху Бямбажавты (Ооржак) база Каң-Сорук Чимеддрожту (Иргит) чалаан турган. Оларның киржилгези-биле Тыва үндезин культура төвүнүң ажылдакчылары тыва ча адар оюннуң дүрүмнерин база ук оюннуң онзагайларынга хамаарышкан чүүлдерни чыып, аңгы ном кылдыр үндүрген.
Чаны сайзырадырының дараазында базымы кылдыр ооң кылырының технологиязын Тываже эгидип, улаштыр чон аразынга нептередир ажылды эгелээн бис. Республикада ус-шеверлерни, чаңчылчаан тыва культураның мөгейикчилерин, адыгжыларны чыып, тыва ча база согунну кылырының чажыттарын ажыткан бис. Ынчаар ча сайзырадыр шимчээшкин өөскүвүшаан, чоннуң ынакшылын чаалап, тыва эр кижиниң үш оюнунуң санынче шилчээн.
2021 чылдың август 2-де Чазактың доктаатканы-биле, Наадым байырлалында ча адарынга шылгарап, бирги черни чаалап алган адыгжыга “Мерген адыгжы” деп хүндүлүг атты тыпсыры хоойлу-биле быжыглаттынган.
Тыва ча адар оюн бөгүн республика чергелиг байырлалдарның чарылбас кезээ болу бергени өөрүнчүг-дүр, ол дээш база черле арга-сүмезин берип, байлак дуржулгазы-биле үлежип чоруур эштеривиске хүндүткеливис база өөрүп четтиргенивис илеретпишаан, изиг байырывыс чедирип тур бис.
