Тыва Республика хунунде Москва хоорайның 163 дугаарлыг ном санынга Россия Федерациязының культуразының алдарлыг ажылдакчызы, Тываның Улустуң чогаалчызы, амгы үеде ССРЭ-ниң Чогаалчылар эвилелиниң кежигүнү чаңгыс тыва херээжен чогаалчы Артык Ховалыг-биле чогаадыкчы ужуражылга болуп эрткенин Москвада «Тыва» культура төвүнүң удуртукчузу Урана Инванова дыңнаткан.
Ат-сураглыг чогаалчының 75 чыл оюн демдеглээрин уламчылап, «Чалгынныг сөс саарыы/Крылатых слов водопад» деп 75 рубаи, 12 сонет кирген чаа номунуң таныштырылазын эрттирген.
Номну орус дылче очулдурган Россияның Чогаалчылар эвилелиниң кежигүнү Екатерина Пономарева очулга үезинде сөске монокристалл четпес бай, угаадыглыг дуржулганы болгаш бедик сорук кириишкинни алганын онзалап демдеглээн.
Сарыг шажын философиязын, чоннуң мерген угаанын сиңирген номдан рубаилерни номчукчунуң адаан саны-биле автор биле очулдурукчу ийи дылга номчуурга, аалчылар адыш часкап хүлээп ап турганы кайгамчык. Кижи бүрүзү адаан саны-биле бодунга долу, онзагай харыыны алгаш, сагыш-сеткили мерген-биле тудуш, ат салган ном белектерлиг болган.
Айтырыг-харыы викториназынга уруглар идепкейлиг киришкен. Номчукчулар ажы-төлүн эдертип алгаш, улуг поэзияны дыңнаан.
Аалчылар Тыва Республиканың ыдык ырын тура дыңнааш, кады ырлашкан. Чонунга хүндүткелдиг чогаалчының «Үш үне» шүлүүнге бижээн видеороликти улуг экрандан көруп сонуургаан.
Ужуражылганың киржикчилери сүүзүннүг шүлүктерни номчукчуларга ам-даа шаңнап, узун назылаарын 75 харлааны-биле ховар дээн салым-чаяанныгларның бирээзи чогаалчы энеге күзээн.
Урана Иванова А.Х-О. Ховалыгның чечен чогаалдарының үнелекчилери Москва хоорайда делгемчээнин демдеглээн.
