Москвага Тыва Республиканың Культура хүннери болуп эртер

Келир неделяда, Россияның найысылалынга, Тыва Республиканың Культура хүннери ажыттынар.

Москваның чурттакчылары база аалчылары Тываның уран чүүл мастерлериниң хөгжүм, кинематография, чурулга, хореография, ус-уран чогаадылга ажылдарын ноябрьның 20-23 хүннеринде сонуургап көөрлер.

Бистиң республиканың Культура хүннери РФ-тиң Камгалал яамызының Культура департаментизи биле Тываның Москвада төлээ чериниң деткиишкини-биле болуп эртер.

Ноябрьның 20-ден 26-га чедир Российжи Армияның Төп бажыңынга Тыва Республикага Армейжи культура хүннеринде болуп эрткен Шериг болгаш ада-чуртчу кино фестивалынга киришкен тыва киноларны көргүзер. Ол ышкаш ноябрьның 23-ке чедир Тываның «Дайын. Тиилелге. Сактыышкын» ном-чуруктар делгелгези база чонар-даш уран чүүл мастерлериниң ажылдарын бараалгадыр.

Ноябрьның 22-де, Российжи Армияның Төп академиктиг театрының фойезинге тыва национал хөгжүм херекселдерин делгээр. Ада-чурттуң улуг дайынынче тыва эки турачыларның аъттанганындан бээр 80 чыл болганынга база тускай шериг операциязында киржип турар оларның салгалдарынга тураскааткан «Фронтуже эки турачылап чоруткан мен!» деп делгелге, Тывага эрткен “Бистиң камгалап турарывыс тайбың” деп пленэр түңнелдериниң ажылдарын делгээр.

Ноябрьның 22-де 19.00 шакта, Российжи Армияның Төп академиктиг театрының сценазынга, Россияның Камгалал яамызы биле бистиң республиканың мастерлериниң база чогаадыкчы коллективтериниң каттышкан “Уран чүүлге бараан болуп – Россияга бараалгаар” деп Тываның уран чүүл ажылдакчыларның концерти культура неделязының улуг болуушкуну болур. Концертче кирери халас – ttps://pprt.timepad.ru/event/2668868/ сайтыга баш бурунгаар бүрүткедир.

Россияның улустуң артизи Игорь Бутман база "Тува Джаз Бэнд", Россияның болгаш Тываның алдарлыг артизи, полковник Сергей Дурыгинниң удуртулгазы-биле Россияның Камгалал яамызының Төп шериг оркестри, «Кызыл Сылдыс» ыры болгаш сам ансамбли, Тываның национал оркестри, «Саяннар» Тываның национал хөгжүм болгаш танцы театры, Тываның Чазааның Т.Д. Дулуш аттыг Үрер хөгжүм оркестри, "Алаш" бөлүү, Улуг театрның Аныяктарның опера программазының солизи Карина Ховалыг, Станиславский база Немирович-Данченко аттыг Москваның академиктиг хөгжүм театрының солистери Субедей Дангыт биле Камилла Исмагилова, цирк артизи Демир Хертек, Борис Салчактың ыры студиязының кижизиттирикчилери, аныяк сылдыстар Денберел Ооржак, Ай-Кыс Кыргыс, Аяс Дамдын, Ай-Херел Шулуу болгаш өскелер-даа көрүкчүлерга бараан болур.

Сөөлгү хүн, ноябрьның 23-те, «Саяннар» национал хөгжүм болгаш танцы театры биле Российжи Армияның А. Александров аттыг ыры болгаш плясканың академиктиг ансамблиниң артистери каттышкан мастер-классты эрттирер. Москвадан чоруур бертинде, Тываның артистери шериг госпитальдарга чедип, ында чыдар чаңгыс чер чурттуглары – тускай шериг операциязының киржикчилери-биле ужуражыр.

Тыва Республиканың Культура яамызы-биле Россияның Камгалал яамызының Культура департаментизиниң дугуржулгазы езугаар, бо чылдың сентябрьда Тыва Республикага Армейжи культура хүннери болуп эрткенин сагындыраал. Ол программа 600 ажыг киржикчини хаара тудуп, Тываның чурттакчыларынга мастер-класстарны, чогаадыкчы ужуражылгаларны, делгелгелерни база концерттерни эрттирген.