Муң ажыг бажыңга өрт медээчилерин эптеп салыр

Тываның Күш-ажыл болгаш соцал политика яамызы одалга сезонунуң бертинде 758 өрт медээчилерин садып алган. Ук херекселди муниципалдыг тургузугларның тускай комиссияларлыг социал дуза төптеринче дамчыдарын сайыт Эдуард Сандан дыңнаткан.

Амыдыралы чегей өг-бүлелерниң бажыңнарынга медээчилерни бо чоокку үеде салыр. Албан чериниң бюджединде камнаттынган акша-хөреңги-биле ам-даа үш чүс ажыг медээчини садып алыры планнаттынган деп, сайыт чугаалаан.

Чурттакчы чоннуң амыдыралы чегей бөлүүнүң өртке удур айыыл чок чоруун хандырар дээш, республика бюджединиң акша-хөреңгизи-биле саткан медээчилерни хөй ажы-төлдүг болгаш эвээш орулгалыг өг-бүлелерниң, амыдыралдың берге байдалынга таварышкан болгаш социал айыылдыг байдалда өг-бүлелерниң бажыңнарынга салырын сагындыраал.

2018 чылдан бээр республиканың Күш-ажыл яамызы өрттен кижилерниң чок болурун болдурбас ажылды чорудуп турар. Бажыңында печказын септеп, чырык удазынын солуп, өрт медээчизи салдырып алыксаан өг-бүлелерга дузалап турар.

Беш чыл дургузунда 1395 автономнуг медээчилерни салган. Бажыңга ындыг медээчилерниң бары чурттакчыларынга бүзүрелди бээр: өрттүң бичии-даа демдээ көстүп, ышталып эгелезе, кылын уйгу үезинде кижини безин оттуруптар медээни берип, бүдүн өг-бүлени угарлыг ыштан камгалаптар. Статистикадан алырга, кижилер өрт үезинде оттан эвес, а угарлыг ыштан чок болуп турар.

Эрткен чылын өрт үезинде 19 кижи мөчээн, ооң санында бир бичии уруг. Угарлыг ыштан 49 кижи когараан, ооң иштинде 13 бичии уруглар барын Онза байдалдар яамызы дыңнаткан.

Тываның эмчилери чылдың-на каракка көзүлбес өлүмден чок болуп турарларның саны көвүдеп турарын демдеглээн. 2023 чылдың чүгле январьда республткага угарлыг ыштан хораннанган алды назы четпээннерни ышкынган. Амыдыралы чегей өг-бүлелер чурттап турар бажыңнарга өрт айыылын болдурбазы-биле медээчилер салыр ажылды күштелдирерин Тываның Баштыңы Владислав Ховалыг негээнин сагындыраал.

Онза байдалдар яамызы тускай мергежилдиглерниң чоруткан шинчилелдери өрттен камгаланыр эң дээштиг аргаларның бирээзи – өрт медээчилеринде деп бадыткаан. Ооң ачызында өрттер саны 25-30 хуу кызырылган, когараан кижилер саны 46-60 хуу эвээжээн. 2022 чылда кожавыс Красноярск крайга өрт медээчилери 29 кижиниң амы-тынын камгалаан, ооң санында чеди чаштар бар.

Тускай албан черлери ажылдакчыларындан дуза манап олурбайн, кижи бүрүзү бодунуң чурттаар черинге өрт медээчизин салдырып болур. Ооң өртээ улуг эвес, акшага камналгалыг элээн каш хевирлерин маркетплейстерден тып ап база болур. Камгалакчылар ону чем кылыр өрээлге, одаар чүүлдер чанынга, машина тургузар черге салдырып алырын сүмелеп турар.