Муң ажыг буурул баштыг хоочун чүс ажыг хемчегге киришкен

Россияның Социал фондузунуң шенелде төлевилел чорудуу-биле Кызылда база Туранда ажыттынган Улуг салгалдың харылзажыр төптери ажылын уламчылап турар.

Төптерге эрткен 100 ажыг хемчегге 1000 ажыг буурул баштыг хоочуннар киришкен. Улуг назылыглар амыдыралдың кадык овур-хевирин суртаалдаан болгаш шын чемненилге дугайында лекцияларны, йога болгаш фитнести сонуургап турарлар.

Ол ышкаш чээли албан черлериниң төлээлериниң саң-хөө билиглеринге хамаарышкан ужуражылгалары дыка ажыктыг дээрзин олар демдеглээн. Буурул баштыглар онлайн-банкыларны ажыглаарын, бузурукчуларны билип алырын, акша-хөреңгизин айыыл чок болдурарын билип алыр аргалыг.

Россияның Социал фондузунуң Тыва Республикада салбыры төптүң аалчыларынга биче ном саңнарын, дыштанылга булуңнарын, мастер-класстар эрттирер, шашки, шыдыраа, стол теннизи ойнаар черлерни, интернетче үнер компьютерлерни аңгылаан.

Төптерни улуг назылыг кижилер аразында харылзажырынга, саң-хөө болгаш компьютер билиин бедидеринге идиг бээр кылдыр ажыткан. Культура албан черлери, социал камгалал эргелелдери, хөй-ниити каттыжыышкыннары, эмнелге организациялары темалыг беседаларын, лекцияларны болгаш мастер-класстарны эрттирип турар. Оон аңгыда аргыттынып-даараныр, аъш-чем кылыр мөөрейлер, делгелгелер, селгүүстээшкин болгаш экскурсиялар база болуп турар.

Төптер дараазында адресте ажылдап турар: Кызыл хоорай, Красноармейская кудумчузунда 146 дугаар бажың; Туран хоорай, Кызыл партизаннар кудумчузунда 21 дугаар бажың. Ажылдаар графигин бо айтыгдан https://sfr.gov.ru/branches/tuva/info/~0/9361
көрүп ап болур.