Мугур-Аксында чырык хандырылгазының ажылында үрелиишкиннерниң уржуун чайладыр бригада ажылдап турар

Чырык талазы-биле тускай мергежилдиглер болгаш «Дизель» кызыгаарлаттынган харыысалгалыг ниитилелдиң эптекчизи Мөңгүн-Тайга кожууннуң Мугур-Аксы суурда электрилиг станцияның чырык четкилеринде токтуң өжүп-кыпкан болуушкунун шинчилеп база чайладыр дээш ажылдап турар. Чырыктың өже бээриниң мурнунда ол хереглекчилерге анаа чедип турган.

Дизелдьдиг электрилиг станцияның с тускай мергежилдиглери ноябрьның 9-та Мугур-Аксының чырык четкизинге өжүп-кыпкан таварылга дериг-херекселдерниң эртир изээш үрелиринге чедирип болурун көргеш, чырыкты бээрин кызыгаарлаар шиитпирни хүлээп алган. ТР-ниң Одалга болгаш энергетика сайыды Эдуард Куулар , бо удаада шын шиитпир хүлээп алдынганын, оон-даа аар салдарлардан чайлай бергенин демдеглээн.

Электри четкилеринге аварийлиг байдалды тургуспазы-биле ноябрьның 10-да Мугур-Аксынга таарыштыр өжүрер графикти ажыглаан: суурнуң чамдык кудумчуларын болгаш объектилерин чырык-биле хандырган 13 дузалал станцияны элээн каш шак дургузунда ээлчештир өжүрген. Тускай мергежилдиглер дузалал станцияларны өжүрүп тургаш, чырык четкизинде үрелиишкинерниң чылдагааннарын тып турар.

Чырык шугумнарын, дизельдиг генераторларны база чырык дериг-херекселиниң деңге ажылдаарын башкарар контроллерлерни хынаан. Дизельдиг генераторлар болгаш өске-даа дериг-херекселдер ажылдап турар. Мугур-Аксы суурда бирээзи-ле 500 кВт күчүлүг дөрт – ийи кол база ийи курлавыр дгенераторлар бар. Бо хүннерде трансформаторну, ооң камгалал системазын база кабель шугумнарын хынаан.

Мугур-Аксы суурда чырык энергиязының хереглекчилерин хандырары-биле "КамАЗ" автомашина баазазында бирээзи-ле 315 кВт күчүлүг ийи мобильдиг генератор чеде берген, чырык четкизинде коштунган, курлавырда контейнер хевирлиг 100 кВт күчүлүг генератор, ажыглалдан үнүп болур удазынны солуур СИП-кабель бар.

Бо шакта кожуунда чырык хандырылгазында байдал чогумчалыг. Яамының тайылбырлап турары болза, чырык шугумнарын, ону бээр дөстер системазын хынаар база хереглекчилерниң эт-хөреңгизи үрелирин болдурбас дээш, түр када чырык бээрин кызыгаарлаан. Ол үеде суурнуң социал объектилери – Мөңгүн-Тайганың төп кожуун эмнелгези, ийи школа, алды уруглар сады ажылын уламчылавышаан, уруглар садтарында чаштарны изиг чем-биле, школачыларны дүрген чиптер чемнер-биле хандырган.

РТ-ниң Одалга болгаш энергетика яамызының баш бурунгаар медээзи-биле алырга, дериг-херекселдерни хынааш, ооң ажылдаарын эдипкен соонда, электрилиг станция штаттыг чурум-биле чырыкты катап берип эгелээр.