Тыва үндезин культура төвүнге салым-чаяанныг ус-шевер Артыш Монгуштуң кылган мыйыс чазының таныштырылгазы болуп эрткенин төп дыңнаткан.
Тыва үндезин культура төвүнүӊ удуртукчузу Игорь Көшкендей чалаттырган аалчыларга тыва чаның ыдыктыг, чажыт күжүнүң дугайында тайылбырны кылган. Төптүң ажылдакчызы, "Шагаа мергени" деп хүндүлүг аттың эдилекчизи Артыш Монгуш үндезин мыйыс чаның технологиязын, кылган чурумун көргүскен видеоматералды бараалгадып, аңаа тода тайылбырны чыглып келген чонга дамчыткан.
Тыва үндезин культура төвү тыва ча адарының бурунгу уран чүүлүн катап эгидип, диргизип алырынга дыка улуг күжениишкиннерни киирген. Ооң иштинде: улуг хемчээлдиг шинчилел ажылдары чоруттунган, ол дээрге төөгү дөстерни шинчилеп, чидирген аргаларны Моол болгаш Кыдат тываларынче черниң ыраан дивейн, үрезин хире билиглерни тарамыктай чыып тургаш, тыва ча кылырының эрте-бурун аргазын камгалалга алган.
Ук хемчегниң боттанганы дээрге Тыва үндезин культура төвүнүң салган сорулгазының чедиишкинниг чымыштыг ажылының улуг бадыткалы дизе чазыг эвес.
Игорь Көшкендей тыва чаныӊ сайзыралынга киирген үлүг-хуузу дээш, кады демнежип чоруур иштежилерин шаӊнаан.
Бурунгаар үениң агымынга алыспайын, ада-өгбелеривистиң бурун езу-чаңчылдарынче хая көрнүп, алдын үүжезин муң-муң, чүс-чүс чылдарның шыгжамыр аптаразындан уштуп, ону өзүп орар салгалдарывыска таныштырар ужурлуг бис деп чүүлдү утпас болзувусса эки.
