Владимир Биче-оол аттыг стадионга Сергелең Ондарның РФ-тиң эң шылгараңгай дайынчы шаңналы – Эрес-дидим чорук орденни болгаш ТР-ниң Начын мөгези хүндүлүг атты алганынга тураскааткан тыва хүреш маргылдаазы болуп эрткен. Анаа 80 ажыг мөге киришкен.
Хүрештиң байырлыг ажыдыышкынының эгезинде дайынчы Сергелең Ондарга маадырлыг чоруу дээш Росгвардияның үш аңгы медалын тывыскан.
ТР-ниң Дээди Хуралының депутаттары Елена Ховалыг биле Сергей Куулар маргылдааның хүндүлүг аалчылары болганнар. Тыва парламентиниң база бир депутады – ТР-ниң Арзылаң мөгези Седен-Очур Кара-Сал маргылдаага хүрешкен.
Депутат Сергей Куулар Дээди Хуралдың Даргазы Кан-Оол Давааның байыр чедириишкинин дамчыткан. «Силер, тыва чоннуң ынак мөгези – республиканың спортчу чоргааралы силер. Улуг маргылдааларга чедиишкиннериңер-биле дээди хүндүткелдиг Начын мөге атты чаалап алгаш, ону төлептиг эдилеп чор силер. Албан ажылыңар аайы-биле тускай шериг операцияга баштайгы хүннерден эгелээш коргуш чок, маадырлыы-биле кириштиңер. Амгы үеде бистиң аравыста чорууруңар, ынак спортуңар – тыва хүрешти суртаалдап турарыңар дээш база өөрүп турар бис» – деп байыр чедириишкининде бижээн. Сергей Куулар чугаазын доозуп тура, Сергелең Ондарга быжыг кадыкшылды, менди-чаагай чорукту, амыр-тайбың амыдыралды, аас-кежикти, а ол ышкаш бедик хей-аътты, сүлде-сүзүктү күзээн.
Күрүне шаңналдарын алган дайынчы мөге Сергелең Ондар өөрүшкүзүн чону-биле үлежип, тыва хүреш маргылдаазын эрттирген.
Маргылдааның шылгараан сес шыырак мөгези. Чаан мөге Сайын-Белек Түлүш шүүлген, Хартыга мөге Начын-Мерген Ооржак үжүүрлешкен. Үшкү-дөрткү шаңналдыг черлерде Арзылаң мөге Монгуш Айдың база Начын мөге Ооржак Кежик. 5-8 кирген мөгелер – Арзылаң мөге Седен-Очур Кара-Сал, Начын мөге Артыш Монгуш, кожуун чергелиг Арзылаң мөге Мөңге-Эртине Куулар база Сүт-Хөл кожуунуң төлээзи аныяк мөге Түметей Ширижик.
