Национал хепти кедип алырга, кижи каас-шиник, чоргаар көстүр

Чөөн-Хемчик кожуунда «Социал керээ» программазы-биле ажыл-херээн ажыдып алган улустуң саны 150 ажып турар.

Чоокта чаа Чадаанага «Ужук» деп хеп даараар черни Эмма Конгар ажыткан. Ол бүдүрүлгеге ажыглаар даараныр машиналар, пөстүң кескен чериниң кыдыгларын даараар машина, бус-биле хеп базар херексел, тускай илиир, хеп базар болгаш кедирер эт, улуг хеп быжар стол, көрүнчүк, шкаф, аскыыштар, пөс-таавы садып алгаш, ажыл-херээн эгелээни ол.

Шевер пөстери-биле кышкы, күскү, часкы болгаш аржааннап кедер тоннарны, концерт хевин даарап турар.

– Чадаанга хеп даараар черни шагда-ла ажыдарын бодап чораан мен. Күрүне деткимчезиниң ачызында күзелим бүткени ол. “Социал керээ” программаның акша-хөреңгизин алган дораан дааранылга дериг-херекселдерин садып алдым. Чоорту немей шкаф база садып алыр мен.

Кижи бүрүзү тыва тонун кедип алгаш, чоргаар кылаштап чоруурун күзээр мен. Ынчангаш чиңгине тыва хеп даарар шевер, дизайнер Кежикей Донгакты даараныр курстарынга өөренип алдым. Ол меңээ национал тон даараарының чажыттарын дамчыткан. Башкымның өөреткени езугаар тонну даарап оргаш, йөрээлдер номчуур-дур мен.

Чагыглар үзүлбес, доктаамал кээп турар улузум бар. Чагыглар көвүдей бээрге, дуңмам дузалажып турар. Ол мал-маган тудуп турар болгаш малының кежинден бопуктарны база даараар кижи.

Хоорайывыска амыдырал-хандырылга бажыңы ажыттынарын дыка күзээр мен. Чаңгыс оран-савага баш таарар, хеп даараар, идик септээр дээш оон-даа өске ачы-дуза чедирип турар мастерлер ажылдаар болза, чурттакчы чонга дыка эптиг болур ийик – деп, шевер чугаалап турар.

Чадаанажылар хевин септедир, эде даарадыр дээш хөй чагыгларны киирип турары – Эмма Конгарның хеп быжар столунда чыскаай салган хеп херечилеп турар.

Национал хепти кедип алырга, кижи каас-шиник, чоргаар көстүр. Амгы үеде эр-даа, херээжен-даа чон тыва хевинче улуг сонуургалдыг болуп, байыр-найырда кедип турар апарган. Аныяктар, ылаңгыя келин кыстар кудазынга тыва платьелерни даарап кедип эгелээни база онзагай.

Чуруктарны Шончалай Ховалыг тырттырган