«Тубтен Шедруб Линг» хүрээзиниң байырлыг ажыдыышкынынга Россияның аңгы-аңгы булуңнарындан хүндүлүг лама башкылар моорлап кээп турар.
Россияның буддийжи Сангхазының Красноярск хоорайда эргелекчизи Шакья Лама Национал школа хөгжүдер институтка аалдап келгенин институт дыңнаткан.
Ол институттуң ажылдакчыларының төрээн дылды өөредиринге белеткеп үндүрген ажылдары болгаш тыва дылда үнген буддийжи литература-биле сонуургап танышкан.
Кижиниң иштики сагыш-сеткилиниң эки талаже угланырынга төрээн дылынга бижээн өөредиглиг, кижизидилгелиг уткалыг ажылдарның ажыктыг салдарын айтып, Красноярск крайның эдип-чазаар черлеринде хамаатыларга тыва дылда буддийжи номнарның негеттинип турарын чугулалаан.
Ужуражылга үезинде Шакья Лама башкы Россияга буддизмниң сайзыралының база Иволга дацанда өөредилге кандыг угланыышкынныг чоруп турарын кысказы-биле таныштырган.
Институттуң директору Елена Куулар коллективтиң мурнундан Шакья Лама башкыга четтиргенин илередип, тыва дылда бижиттинген буддийжи литератураны херек черинге чедирип бээри-биле белекке сунган.
