Тывага сөөлгү үш чылда 400 ажыг километр автоорукту болгаш 22 көвүрүгнү эде чаартып септээн. 2025 чылда ниити узуну 156 километр 33 орук участоктарын септээрин ТР-ниң орук-транспорт сайыды Шораан Чыргал-оол дыңнаткан.
Бии-Хем кожуунда Хадың, Бай-Тайга кожуунда Тээли суурларже кирер оруктарны, Копту-Аксы – Тоора-Хем, Мугур-Аксы – Кызыл-Хая аразында автооруктарны, Бүрен-Аксы – Элегес-Аксы– Кунгуртуг кышкы оруктуң Сизим суурга чедир участогун, Хадың биле Дус-Хөл хөлдерже кирер оруктарның байдалын нормативтиг негелделерге дүүштүр чаартып септээри планнаттынган.
Россия биле Моол күрүне кызыгаарында Хандагайты эрттирилге пунктузунуң тудуг-эптелге ажылдарын доозуп, ону хөй талалыг эрттирилге пунктузу кылдыр долузу-биле ажылдадыры, Улуг-Хемни кежир Баян-Кол суурже көвүрүгнүң төлевилел-дөзевилел документациязын ажылдап кылыры, ол ышкаш Кызылдың аэропорт комплекизинче пассажирлер аргыштырылгазын сайзырадыры 2025 чылда ажылдарның планынче кирген.
Чоокку алды чылдың планынче 575 хире километр оруктарны септээри болгаш тудары, “Чуртталганың инфратургузуу” национал төлевилелдиң угланыышкыны-биле машиналар тургузар черлерни болгаш чадаг кижилер кылаштаар оруктар тротуарларын чаартыр болгаш чаагайжыды септээр.
Тыва Республика биле Россияның Автоорук яамызының аразында чарган 10 миллиард рубль хемчээлдиг, 2030 чылга чедир хуусаа үезинде күштүг Меморандумнуң акша-хөреңгизиниң хемчээлин тургустунуп кээп болур байдалдар-биле холбаштыр эде көрүп болурун Тываның Баштыңы Владислав Ховалыг чугаалаан. Чүге дээрге ында өзек чүүл — Азия болгаш Оожум океан девискээринче транспорт коридорун ажыдары Тываның девискээринде автоорук инфратургузуун хөгжүдери-биле харылзаалыы.
