Чурттуң Президентизи Владимир Путинниң саналы-биле эгелээн «Культура» национал төлевилелди боттандырып, Тываның алды кожуунунда культура албан черлеринде тускайжыттынган автотранспорт бодунуң девискээринде эң ырак черлерже үнүүшкүннерни организастаан.
Автоклубтар чүгле эрткен чылда аңгы-аңгы темалыг 87 культура-массалыг хемчегни эрттирип, 52 чурттакчылыг черлерге четкен. Көжүп чоруур культура бажыңнарының эрттирген хемчеглерин 30 муң хире көдээ чурттакчы көрген.
Хову-шөлдерже үнүп, ажык дээр адаанга концерт номерлеринден эгелээш кинога чедир көргүзер кылдыр автоклубтарны дерээн. Көжер клубтар сценалыг, үн улгаттырар, чырык-биле каастаар аппаратуралыг, ноутбуктар, проекторлар, стабилизаторлар, генераторлар-биле хандыртынган.
Тус черниң артистери бодунуң кожуунунда культура бажыңнары чок бичии суурларже, малчын коданнарже, хову-шөлдерде турлагларже, аржааннарже үнүп, культура-массалыг хемчеглерни эрттирип турар.
Чижээ, Бай-Тайгада Н. Өлзей-оол аттыг культура бажыңының ажылдакчылары хоочуннар-биле кады, күскү дүжүт үезинде комбайн башкарыкчыларынга, а кыжын кыштагжыларга концерт номерлерин бараалгаткан. Тус чер чурттакчылары “дугуй кырында хуулгаазын” культура одааның ажылдакчыларынга четтиргенин илередип турарлар.
2022-2023 чылдарда Бай-Тайга кожууннуң Тээли; Чөөн-Хемчик кожууннуң Бажың-Алаак; Эрзин кожууннуң Эрзин; Кызыл кожууннуң Сукпак; Таңды кожууннуң Бай-Хаак суурларның культура бажыңнары база Каа-Хем кожууннуң Сарыг-Сеп суурда культура сайзыралы болгаш дыштанылга төвү хөй ажыл-чорудулгалыг көжүп чоруур культура төптерин, азы автоклубтарны алган.
Амгы үениң автоклубтарын алыр дизе, көдээ культура-дыштанылга албан черлери Культура яамызының чарлааны мөөрей шилилгезинге киржир ужурлуг. Аар өртектиг транспортту шын болгаш чөптүг ажыглалын кордакчылар бадыткаар ужурлуг.
Тываның студентилери буддийжи университеттерде
Дээди өөредилге черлериниң студентилери буддизмниң философиязын, медициназын болгаш сарыг шажын уран чурулгазын өөренип турар.