Национал төлевилел-биле Тывада суггат системаларын катап тургузуп турар

«Делегей кооперациязы болгаш экспорт» национал төлевилелдиң боттандырганының ачызында, регион 20 ажыг чыл ажыглал чок турган инженер-техниктиг улуг системаларны катап тургузар аргалыг апарган.

Сөөлгү ийи чылда Тывада суггарылга системаларын катап тургузар ажылдар шапкынчаан. Россияның Президентизи Владимир Путинниң «Делегей кооперациязы болгаш экспорт» национал төлевилелиниң деткээни «Агроүлетпүр комплекизиниң продукциязының экспорту» төлевилел-биле инженер-техниктиг улуг системаларны катап тургузар ажылды чорудуп турар.

Тываның Баштыңы Владислав Ховалыг республика девискээринде суггарылга системаларын катап тургузар ажылды күштелдирип, көдээ ажыл-агый угланыышкынныг октаттынган черлерни чогуур байдалче киирерин Көдээ ажыл-агый яамызындан база чагырга черлериниң даргаларындан негээн.

Федералдыг деткимче-биле республиканың суг мелиорация системаларын катап тургузарын каш катап дүргедеткен.

ТР-ниң Көдээ ажыл-агый яамызының медээзи-биле алырга, бо чылын Барыын-Хемчик, Чеди-Хөл база Каа-Хемде суггарылга системаларын катап ажылдадыр, Барыын-Хемчик, Бии-Хем, Чеди-Хөл база Каа-Хем кожууннарга культуртехниктиг хемчеглерлиг беш төлевилел деткимчени алган.

Тарылгага ажыглаар шөлдерни бок үнүштерден, даш-когурум база боктан аштап арыглаары культуртехниктиг хемчеглерде кирген. Албан чериниң үнүш ажыл-агый болгаш механизация килдизиниң начальниги Эртине Монгуш төлевилелдиң ниити түнү 80 сая рубль деп дыңнаткан.

Улуг ажылды кылган соонда, экспорттаар продукцияны бүдүрүп эгелээр. Бо чылдың май-июньда 1500 гектар ажыг черге көдээ ажыл-агый культураларын тарыыры планнаттынган, 203 гектарга кызыл-тасты, 326 гектарга арбайны, ол ышкаш суланы база хөй чылдыг сигенни тарыыр.

Эрткен чылын беш кожуунга алды культуртехниктиг хемчеглерни боттандырган. «Малиновская» – республикада улуг суггарылга системазы. Бо чылын эде чаарткан «Малиновская» системазын ажыглап эгелээрге, Бии-Хем кожуунда 304 гектарда тарылга болгаш сиген шөлдери суггаттыг черлер апаар. Ол черлерден ниитизи-биле 270 тонна тараа культразының дүжүдүн алырын тус чер чагыргазы санаан.