ТР-ниң Дээди Хуралынга «Кадыкшыл биле уран чүүлдүң таарымчалыы» деп республика марафонунуң түңнелдерин үндүрген.
Парламентиниң Кадык камгалал, чонну ажылга хаара тудар болгаш социал политика талазы-биле хораазының даргазы Долаан Калбак, депутаттар Ульяна Монгуш биле Анджела Канчыыр-оол марафоннуң идепкейлиг киржикчилеринге байырын чедирип, Өөрүп четтириишкин бижиктерин тывыскан.
Ээлчеглиг марафонга 70 ажыг кижи – тускай шериг операцияның киржикчилериниң болгаш аңаа маадырлыы-биле амы-тынын берген дайынчыларның авалары болгаш өөнүң иштилери киришкен.
Төлевилелдиң кол сорулгазы – кадык камгалалы биле культура адырлары демнежип тургаш, чурттакчы чон аразынга кадык чаагай амыдыралды суртаалдаары, оон аңгыда эмчи шинчилгезинче, кадыкшыл быжыглаашкынынче чонну хаара тудары болур. Түңнел сорулга – кижиниң назынын узадыры болгаш кадыкшылын экижидери.
Марафон үш чадага эрткен. Баштай киржикчилерни эмчилер шинчилээн, кадыкшылының байдалдарын тодарадып, эмнениринге арга-сүмени берген. Ийи дугаарында киржикчилерниң кадыкшылын экижидериниң талазы-биле ажылдар эгелээн – кадыкшылга, спортчу болгаш культура талазы-биле бөлгүмнер ажылдап турган. Марафончулар делгелгелер болгаш ярмаркалар көргеннер, культурлуг хемчеглерге база киришкеннер. Үшкү, төнчү чадада, киржикчилерниң кадыкшылын эмчилер катап хынаан, улаштыр хөделиишкиннерни саналдаан. Бо бүгү хемчеглер бир ай хуусаа иштинде боттанган.
ТР-ниң Дээди Хуралы биле Хөй-ниити кадыкшылының болгаш аарыгларны баш удур болдурбазының талазы-биле республика төвү ук хемчегни демнежип боттандырган.
