Үндүрүглер төлевириниң дугайында медээни хууда кабинединден хынап алыры чугула

Тываның үндүрүг албанының тускай мергежилдиглери эң шынчы үндүрүг төлекчилер үндүрүглеринге өрелерлиг апаары чадавас деп, Тываның чурттакчыларынга сагындырган. Оон ыңай, оларның көвей кезии үндүрүг албан черлеринден торгаалдар болгаш хуулар дугайында дыңнадыгны албаан шаанда, төлевейн турар улус даңзызында киргенин билбейн баарлар.

Шак ындыг эпчок чүүлдерден чайгаар дизе, үндүрүглер төлээриниң сөөлгү хүнү – декабрь 1-ге чедир Федералдыг үндүрүг албанының сайтызында nalog.ru бодунуң хууда кабинединче кирип, шупту төлевирлерин төндүр төлээнин, кандыг-даа өрелер чогун катап хынаарын хамаатыларга сүмелеп турар.

Үндүрүг ажылдакчыларының чугаазы-биле алырга, кижилер үндүрүглеринден өжегерээн ойталавайн турар. Чамдыктар төлевирлерни канчаар санаарын, төлээрин билбес. Эрткен чылдарда өрелиг улус бо чылдың өрезин төлептерге, эрги өрези ала чайгаар үндүр бижиттине бээр. Амгы өрезин төлепкен дээш таваар олурда, программа ол кижини хууларда, торгаалдарда, судтарда өрелери дээш, шынчы эвес төлекчилер санынче киириптер.

Ынчангаш чөптүг эвес чорукту чайладыр дизе, кижи бүрүзү Федералдыг үндүрүг албанының сайтызында бүрүткеткен хуу кабинединче киргеш, эт-хөреңги үндүрүглеринде өрелери барын хынаары күзенчиг. Албан чериниң ажылдакчылары чылда ону ийи-үш катап хынаарын сүмелээн. Ынчалза-даа республиканың чурттакчылары чыл-чылдары-биле ол сервисти хынаваанының түңнелинде, үндүрүг албанының «кара даңзыда» турарын практика көргүскен.

Үндүрүглер төлээриниң сөөлгү хүнү – декабрь 1-ге чедир каш хонук арткан. Тываның Баштыңы Владислав Ховалыг эт-хөреңги үндүрүглери тус чер бюджеттеринге арттарын база чырык, чылыг, газ база суг хандырылгаларын организастаарынче база чурттакчы чоннуң хөмүр болгаш одаар ыяш хандырылгазынче чарыгдаарын демдеглээн. Ол-ла акша-хөреңги эвээш орулгалыг улуска чуртталга тудуунче, культура адырын деткииринче база хамаатыларның амыдырал-чуртталгазын таарымчалыг болдурар дээн чаңгыс сорулгалыг өске-даа төлевилелдерже киириштирер.