Ниити-российжи Улусчу фронт “Путинниң командазының” шаңналын тывыскан

Россияның Президентизи Владимир Путинниң эгелээшкини-биле тургустунган Ниити-российжи Улусчу фронт күүседикчи күрүне органнарының болгаш ажыл-агый субъектилериниң ажыл-чорудулгазында четпестерни илередип, оларны чок кылыр талазы-биле хемчеглерни ап чорудуп турар.

Улусчу фронтунуң регионда салбырының күүсекчи комитединиң удуртукчузу Саима Далчин бо чылын Ниити-российжи Улусчу фронт тургузукчу хуралын эрттиргенинден бээр он чыл болганын демдеглээн.

– Он чыл дургузунда бистиң организациявыс үениң аайы-биле нарын айтырыгларга харыылап турар. “Ковид” чылдарын база кады эртивис. Тускай шериг операциязының баштайгы хүннеринден эгелээш бистиң күжүвүс тайбың чурттакчыларга болгаш дайынчыларывыска ачы-дуза көргүзеринче угланган. “Бүгү чүүлдү тиилелге дээш!” төлевилел Тываның эриг баарлыг чурттакчыларын, сая-сая российжилерни каттыштырган – деп, ол дыңнаткан.

Тываның Баштыңы Владислав Ховалыг Улусчу фронтунуң Тывада салбырының идепкейжилери-биле ужуражып, хуралга киришкен.

– Ниити-российжи Улусчу фронт, каттыштырган күш дег, чоннуң сонуургалдарының камгалалында турар хөй-ниити шимчээшкин. Президентиниң шимчээшкини социал айтырыглар – школаларда өөреникчилерниң изиг-чем-биле хандырылгазындан эгелээш автооруктарда септелге болгаш тудуг ажылдарын шыңгыы кичээнгейге алган. Эксперттерниң саналдары болгаш шүгүмчүлели күүсекчи эрге-чагырга органнарының ажылын экижидеринге идиг болур.

Амгы үеде Улусчу фронтунуң Тывада салбыры шериг албан-хүлээлгелиглерге ачы-дуза чыыр штаб төвүнүң ажылын күүседип турар. Чоннуң чаңгыс эп-сеткилиниң чылында республиканың чону бир демин көргүзүп, «Автопоезд» акциязынга катчып, кыска үе дургузуда орук чок черлерни эртип шыдаар, тускай чепсеглеттинген эң хөй автомашинаны Тыва чоруткан. Моон-даа соңгаар “Улусчу полк” – дайынчыларга чугула херек чажыртынып шыптынар четкилер кылып турар эки турачыларны бүгү талалыг деткиир мен.

Спортчулар, артистер, сайгарлыкчылар, башкылар, эмчилер, тренерлер, дайынчы хөделиишкиннер хоочуннары – олар шупту ачы-дуза чүъгүн чыып, тускай шериг операциязынче болгаш чурттувустуң чаа девискээрлеринче чедирип турарлар. “Бүгү чүүлдү тиилелге дээш!” төлевилелдиң Өөрүп четтириишкин бижиктерин болгаш “Путинниң командазының” Хүндүлел бижиктерин улуг чогаарал-биле тывыстым – деп, Тываның Баштыңы чугалаан.

Күүсекчи төп комитеттен Сибирь болгаш Ыраккы Чөөн чүк федералдыг округтарының регионнары-биле ажылдаар департаментиниң удуртукчу Ирина Родина биле кол чөвүлекчи Егор Смирнов киришкен.

Тываның чурттакчыларынга “Путинниң командазы” шаңналын тывыскан. Хүндүлел бижиктерни болгаш хөрек демдектерин амыдыралдың аңгы-аңгы адырларында ажылдап турар улус алган. Оларның бирээзи – Таңды кожууннуң төвү Бай-Хаак суурда РСФСР-ниң алдарлыг тренери Валерий Оюн аттыг спорт ордузунуң директору, Лондонга XIV Паралимпий оюннарының чемпиону Михаил Оюн.

“Бо нарын үеде, бүгү Россия – Путинниң командазы. Бис ам демнии-биле каттыжып, төрээн чуртувусту болгаш Президентивисти деткииривис чугула. Мен Чурттуң Баштыңының командазында болганымга чоргаарланып, шаңнал алганымга өөрүп тур мен” – деп, ол чугаалаан.

Тываның чону “Дамырактар чыылгаш, хем болур, тарамыктар чыылгаш, күш болур” деп тыва улустуң үлегер домаанда дег демниин көргүзүп, шериг оолдарга ачы-дуза чедирилгезин уламчылап турарлар.

Донецк база Луганск улус республикаларның чурттакчылары “Путинниң командазының” шаңналын алганнарның баштайгылары болган.