Тываның школачылары Красноярск крайга эрткен «Ногаан каптагай» профильдиг сменага киришкенин республиканың немелде өөредилге сайзырадыр төвү дыңнаткан.
Чоокта чаа Дивногорск хоорайга «Бирюса» аныяктар шуулганы эрткенин сагындыраал. Ооң «Ногаан каптагай» профильдиг сменазынга Сибирь федералдыг округтуң школачылары киришкен. Шуулганны Сибирьниң М.Ф. Решетнев аттыг күрүне университеди организастаан болгаш, 150 школачыны хаара туткан.
Шуулганга Тываны Балгазынның «Хадылыг арга» школачы арга-арыг даамалының командазы Юлия Тукурееваның удуртулгазы-биле төлээлээн.
«Ногаан каптагай» профильдиг сменаның программазынче эксперттерниң мастер-класстары, төлевилелдер тургузары, чурагайлыг технологиялар-биле ажылдаары дээш оон-даа өске солун чүүлдер кирген.
