Россияда сарыг шажынның эң улуг өргээзи болур «Тубтен Шедруб Линг» хүрээзиниң ном саңының ажылдакчызы Светлана Кызыл-оолдуң дыңнатканы-биле алырга, амгы үеде ном шыгжамырында муң ажыг ном бар.
Светлана Кызыл-оол Бии-Хем кожууннуң Аржаан ортумак школазынга 30 ажыг чыл химия болгаш биология башкызы болуп ажылдааш, хүндүлүг дыштанылгаже үнгеш, ном саңында ажылдай берген.
– Ном саңында Бурган Башкының ыдык өөредииниң дугайында тыва, эрги моол, төвүт, орус дылдарда номнар шыгжаттынган. Хүндүткелдиг Башкыларывыстың дамчыткан үнелиг номнары болгаш судурлары база бар. Амгы үеде 130 ажыг бижидикчилиг бис. Олар доктаамал кээп, номчуттунуп турар.
Чүдүкчүлерден аңгыда хүнде 20-30 хире кижи кээп, мында кандыг номнар болгаш судурлар шыгжаттынып турарын билип алыксап, тайылбырны ап турар. Ылаңгыя, школачы уруглар болгаш аныяк-өскен улуг сонуургал-биле кээп турары өөрүнчүг. Номчукчуларның саны хүнден хүнче көвүдеп турар.
Чоокта чаа ном өргээзин бичии оолдар сонуургап келген. Оларга «Будда бурган башкы база бодхи ыяжы» деп номну кезектеп номчуп бээримге, дыка кичээнгейлиг дыңнаан. Айтырыглар салырымга, саат чокка шын харыыларны бердилер.
Кырган-ачам Түбтен Хелиң Моолдуң Кандан хүрээзинге сес чыл ишти өөренген эмчи лама башкы. Ооң сагыш-сеткилинде сиңе берген Бурган Башкының өөредии уругларынга буян-кежик болуп дамчып келген. Аныяамдан тура сарыг шажын чүдүлгезин сонуургап эгелээн мен.
«Тувамедиагрупп» медээлер агентилелдиң журнализи ном саңынга буддизм дугайында номнарны белекке бергени дээш четтиргенивисти илередип тур бис – деп, ол ажыл-ижин таныштырган.
Шыгжамырда номнарның хөй кезиин “Тибетти кадагалаал” фонд дамчыткан. Россияда эң улуг сарыг шажын хүрээзиниң ном саңында үнелиг номнар, судурлар саны немежип турар.
Чуруктарны Шончалай Ховалыг тырттырган
