Тываның А. С. Пушкин аттыг национал ном саңы «Номчу, Тыва!» деп ном фестивалын үш дугаар чыл эрттирип турарын дыңнаткан.
Россияда чоннарның чаңгыс деминиң чылынга тураскааткан ном фестивалының база бир хүндүлүг аалчызы – шүлүкчү, Россияның, Тываның чогаалчылар эвилелдериниң кежигүнү, Донгак Барыкаан аттыг шаңналдың лауреады Энэрэл Ким-биле солун ужуражылганы чурт-шинчилел чогаалы болгаш национал библиография килдизиниң ажылдакчылары эрттирген.
Энерел Ким школачы тургаш-ла, баштайгы шүлүктерин бижип эгелээн. «Самагалдайның сарыг чечээ» чечен чогаал каттыжыышкынының кежигүнү. «Хайыралдыг Эрзин, Тезим», «Чулам буяны» деп номнарны бижээн.
Шүлүкчүнүң элээн хөй шүлүктери улустуң ынак ырылары апарган. Чижээ: «Самагалдай», «Даңгыракка бердинген бис», «Мээң авам», «Кыстарымга» дээш, оон-даа өске.
Ужуражылганы Тываның улустуң чогаалчызы Николай Куулар ажыдып, шүлүкчүнүң октаргай көрүжүнүң делгемин, бодалы чечен, үнү дыңзыг апарганын онзалап, демдеглээн. Ол ышкаш, моон-даа соңгаар демир-үжүүн салбайн чараш шүлүктерни бижиирин чогаалчы, башкы Лидия Ооржак, Самагалдайның 2 дугаар школазының тыва дыл болгаш чогаал башкызы Анджела Тирчин, чаңгыс классчылары байыр чедирген.
Оон ыңай Тес-Хем кожууннуң чагырга даргазы А.В. Лаңаа база культура ажылдакчызы С.Д. Баяндай, өөредилге килдизиниң даргазы Е.А. Эртине, кожууннуң Даа-Ламазы Чамбал башкы чогаалчыга чылыг, чымчак йөрээл сөстерни чугаалаан.
Тыва Республиканың культуразының алдарлыг ажылдакчызы, композитор, ыраажы Кертик-оол Данзын, аныяк ыраажы Артыш Саая, Теве-Хаяның культура ажылдакчызы, бот-тывынгыр ыраажы Лилия Куулар аян туткан.
Энэрэл Кимниң «Шүлүктерим аян-чоруунче чаладым» деп таныжылга-ужуражылгазынга чалаткан аалчылар, номчукчулар улуг сонуургал-биле киришкен.
«Номчу, Тыва!» фестивалы чогаалчыларның, номчукчуларның, эртемденнерниң, номга ынактарның, ном саңының ажылдакчыларының чаңгыс черге чыглып, арга-сүме солчуп, чаа-чаа ажыктыг медээлерни дыңнап, көрүп, ужуражыр, эң-не кол чүүл – номга ынакшыл дугайында, барык-ла, хүннүң чырыы-биле дөмей, кижилерниң мээ-медерелинге амданныг чемиш бээр чырыткылыг чепсек.
