Тываның А. С. Пушкин аттыг ном саңының национал болгаш чурт-шинчилелдер чогаалының килдизинде Россия Федерациязының болгаш Тыва Республиканың чогаалчылар эвилелиниң кежигүнү, шүлүкчү, прозачы Октябрь Туң-оолдуң 80 харлаан юбилейинге тураскааткан «Сɵстер дизии» деп номнар делгелгези салдынганын ном саңы дыңнаткан.
О. К. Туң-оол чогаал ажылын 1973 чылдар үезинде бижип эгелээн. Бир дугаар шүлүү 1973 чылда «Тываның аныяктары» солунунга парлаттынган.
Октябрь Кыргысовичиниң бир дугаар ному «Кавай черим» деп аттыг 1993 чылда чырыкче үнген. 1995 чылда «Чеди-Хаан» деп шүлүктер чыындызы парлаттынган. 2008 чылда сонеттер, шүлүктер, очулгалар чыындызы «Үшкү эрик» деп аттыг үнген. 2001 чылда «Буруулугну бурган билир» деп чечен чугаалар чыындызы чогаалчының ажылынга бир дугаар калбак чогаал бооп бижиттинип үнүп келген. «Дываажаңны көрген кижи» – ийи кезектиг, тоожу, чечен чугаалар, шүлүктер чыындызы кылдыр 2014 чылда үнген.
Чогаалчы 1943 чылдың октябрь 21-де Тыва Арат Республиканың Улуг-Хем кожууннуң Эйлиг-Хем суурунга малчын арат өг-бүлениң ийи дугаар оглу болуп төрүттүнген. Чашкы база чалыы үелерин чогаалчы Чаа-Хөл суурунга эрттирген. Аңгы-аңгы чылдарда, хөй-хөй ажылдарга: көдээ культура бажыңын эргелекчилеп, тудуг черлеринге тудугжулап, харылзаа черинге электри эптекчилеп, совхозка узаныкчылап-даа болуп ажылдап келген.
1970 чылда Кызыл хоорайның эмчи училищезинге өөренип кирип алган. Өөредилге черин, 1973 чылдың июнь айда, дооскаш, Улуг-Хем кожууннуң Арыг-Үзүү суурунуң төп эмнелгезинге диш эмчизи болуп ажылдап кирип алган.
Делгелгеде «Улуг-Хем» сеткүүлдеринге, солуннар арыннарынга үнгүлээн чогаалдары салдынган.
Национал ном саңының национал болгаш чурт-шинчилелдер чогаалының килдизи номчукчуларын «Сɵстер дизии» деп делгелгени көрүп, номчуп сонуургаары-биле чалап турар.
