Бөгүн ТР-ниң Дээди Судунга Тыва Республиканың Үндезин Хоойлузунуң хүнүнге база Ада-чурттуң Улуг дайынының 77 чыл оюнга тураскааткан «Объективте Фемида» деп чурук делгелгезиниң байырлыг ажыдыышкыны болуп эрткен. Суд системазының ажылдакчылары шүүгүнүң төөгүзүн болгаш амгы үезин, бойдустуң тураскаалдарын ажылдарында көргүскен.
Байырлыг хемчегни Россияның Шииткекчилер чөвүлериниң регионалдыг салбырының даргазы Алекмаа Салчак болгаш чогаадыкчы мөөрейниң кол эрттирикчизи болгаш сорук киирикчизи ТР-ниң Дээди Судунуң кеземче херектериниң талазы-биле суд коллегиязының даргазы Хээлиг Түлүш ажыткан.
Россияның Шииткекчилер чөвүлериниң регионалдыг салбырының эрттирген чурук мөөрейинге ниитизи-биле он үш шүүгү киришкен. Жюри кежигүннери 200 ажыг ажылдан дараазында тиилекчилерни илереткен.
«Тываның шүүгүзүнүң төөгүзү» номинацияга бирги черни ТР-ниң Арбитраж суду, ийиги черни Бии-Хемниң район суду, үшкү черни Барыын-Хемчиктиң район суду ээлээн.
«Кижи болгаш хоойлу» номинацияга бирги чер Кызылдың хоорай судунда, ийиги чер Таңдының район судунда, үшкү чер Өвүрнүң район судунда.
«Мээң Тывам» номинацияга бирги черни ТР-ниң Дээди Суду, ийиги черни Тес-Хемниң болгаш Тожунуң район судтары, үшкү черни Эрзинниң район суду ээлээн.
Ол ышкаш «Төөгүге хумагалыг хамаарылгазы дээш» шаңналды Сүт-Хөлдүң район суду, «Төрээн черниң делгемнери» шаңналды Улуг-Хемниң район суду, «Тиилелгеже чүткүл дээш» шаңналды Каа-Хемниң район судунга тус-тузунда тывыскан.
– Суд системазының ажылдакчыларының аразынга чогаадыкчы чурук мөөрейин бир дугаар эрттиргенивис бо. Бөгүн ТР-ниң Дээди Судунуң фойезинге шилиттинген ажылдарны делгээн. Ол ышкаш чурук делгелгезин электроннуг хевирже киирери-биле белеткел ажылдарын чорудуп тур бис. Судтуң сайтызындан чуруктарны кижи бүрүзү көөр аргалыг болур. Оон аңгыда республиканың судтарынга көжүп чоруур чурук делгелгезин база эрттирер.
Шүүгүнүң төөгүзү, төрээн черивистиң катаптаттынмас чараш бойдус-чурумалын көргүскен ажылдар дыка солун болду. Бо мөөрейни Тываның Журналистер эвилели-биле кады демнежип эрттирдивис, ынчангаш хөй-ниити организациязынга четтиргенимни илередип тур мен – деп, Хээлиг Түлүш чугаалаан.
Тываның аңгы-аңгы кожууннарындан келген солун ажылдарны түңнээри амыр эвес болган. Жюри кежигүннеринче «Тувамедиагрупп» медээлер агентилелиниң журнализи, Тываның Журналистер эвилелиниң кежигүнү Шончалай Ховалыг, «Тывамедагрупп» парлалга бажыңының чурук тырттырыкчызы Буян Ооржак олар база кирген.
