Бөгүн Тываның өөредилге сайыдының хүлээлгезин күүседип турар Орлан Соян Кызылда Россияның Маадыры Владимир Жога аттыг кудумчузунда чаа бажыңнарда квартираларның дүлгүүрлерин 11 өскүс уругга байырлыг байдалга тывыскан.
Өскүс болгаш ада-иезиниң хайгааралы чок арткан уругларның аразында тускай шериг операциязының ийи киржикчизи база бар.
«Өскүс болгаш ада-иезиниң азыралы чок өскен уруглар эрге-байдалдыг хамаатыларны чуртталга бажыңы-биле хандырар программа езугаар 2025 чылда 130 өскүс уругну чурттаар оран-сава-биле хандырары көрдүнген. 55 уруг чуртталга сертификаттарын алыр. Ооң түңү – 1 700 000 рубль. Чурттаар оран-сава алырының ээлчээнде дөрт муң ажыг кижи бар» – деп, сайыт дыңнаткан.
Чаа квартираның аас-кежиктиг ээзи Айдың Ооржак өөрүшкүзү-биле үлешкен. «Чурттаар оран-сава алыр ээлчегге 2006 чылда туруп алдым. Тускай шериг операциязының киржикчизи мен. Бөгүн кайгамчык хүн-дүр, чаа микрорайонда квартиралыг болдум. Мергежилим – юрист, амгы үеде ажыл дилеп тур мен. Чурттаар квартира барда, артканы шиитпирлеттине бээр» – деп, ол чугаалаан.
Чуруктарны Ада Тюлюш тырттырган
