Сүт-Хөл кожууннуң Үстүү-Ишкинниң Ак-Хүүректигге 1947 чылда төрүттүнген. 1968 чылда РСФСР-ниң аныяктар аразынга бирги чери дээш Октябрьск хоорайга болган маргылдаага киришкеш, мөңгүн медаль-биле шаңнаткан, ол-ла чылын Алушта хоорайга "Спартак" эки тура спорт ниитилелинин Төп чөвүлелиниң чемпионадынга ийиги черни ээлээш,"ССРЭ-ниң спорт мастери" деп хүндүлүг атты тыва спортчулардан бир дугаар чаалап алган. 1970 чылда Махачкала хоорайга болган маргылдаага мөңгүн медаль болгаш "Эң дидим хүреш дээш" деп кубок-биле шаңнаткан. Хостуг хүрешке Тываның он бир дакпыр чемпиону. Спорттуң национал хевирлеринге Бүгү Россия спартакиадазының национал хүрештер талазы-биле ийи дакпыр тиилекчизи (Агинск, Якутск).
Хостуг хүрешке Бүгү-эвилел чергелиг судья, педагогика эртемнериниң кандидады. Тыва Республиканың алдарлыг ажылдакчызы. Ооң адын "Тыванын XX чүс чылда алдарлыг кижилери" деп Күрүне номунче киирген.
