Онза камгалалдыг бойдус девискээрлеринче төлевирни доктааткан

Тываның Чазаа онза камгалалдыг категорияга хамааржыр бойдус девискээрлеринче төлевирлиг кирер кылыр шиитпирни үндүрген.

«Тайга», «Шуй», “Үш-Белдир» база «Шанчы» дөрт кластер участоктарындан тургустунган регион деңнелдиг “Тыва” бойдус парыгынче кирери өртектиг болур.

Тываның найысылалы Кызылдан ырак эвесте, Бии-Хем кожуунга хамааржыр “Тайга” участогунче кирерде амыдырап-чурттаарының федералдыг кудуку хемчээлиниң 0,66 хуузу хире – 85,9 рубль төлевирни доктааткан.

Найысылал чурттакчыларның дыштаныр хүннерде агаарлаар черлериниң бирээзи – «Тайганың» девискээринде хаак баазазы база бар. Тускай эртемниглерниң санап турарындан алырга, дыштаныр хонуктарда хүнде 100-ден эвээш эвес кижи ында дыштанып турар, чылда чартык сая орулганы ап болур.

«Шуй», «Үш-Белдир» база «Шанчы» онза камгалалдыг бойдус девискээрлеринче кирер төлевирни оон аар – амыдырап-чурттаарының кудуку хемчээлиниң 3,3 хуузу, тодаргайлаарга 429,8 рубль кылдыр тургускан.

ТР-ниң Арга-арыг ажыл-агыйы база бойдус ажыглалының яамызы онза камгалалдыг бойдус девискээрлерлери-биле кызыгаарлашкак суурларның чурттакчылары ынаар халас кирип болурун тайылбырлаан. Ол ышкаш онза камгалалдыг бойдус девискээрлериниң кызыгаарында чер участоктарының ээлерин база хөлезилекчилерин, девискээрни камгалап-карактаар база хөгжүдери-биле холбашкан объектилер тудуунда киржип турар кижилерни, бодунуң хүлээлгелерин күүседип турар албан-хаакчыларны, долгандыр хүрээлел камгалалының хөй-ниити инспекторларын, бойдус камгалалының акцияларын эрттирер дээн эки турачыларны төлевирден хостаан.