Бөгүн хамнар ниитилелдери Культура болгаш дыштанылганың национал парыгында хем белдиринде саң салыр езулалды эрттирген.
Оран-таңдыга чалбарып, сагыш-сеткилди арыглап, чаагай күзээшкиннерни йөрээп, салгалдарның харылзаазын тудары – Шагааның кол кезээ.
ТР-ниң Чазак Даргазының оралакчызы Алик Монгуш саң салыр езулалга келген чонга, өске регионнардан келген аалчыларга болгаш хамнар ниитилелиниң кежигүннеринге Тваның Баштыңының мурнундан база бодунуң өмүнээзинден байырын чедирип, чаларап келген Улуг чылы кижи бүрүзүнге чаагай чолду, бүгүдеге экини сөңнээрин күзээн.
Кызыл хоорайның чагырга чериниң культура, спорт болгаш аныяктар политиказының департаментизиниң төлээзи Солангы Кара-Монгуш саң салыр езулал соонда, тыва оюннар эрттирерин дыңнаткан. Ол ук езулалда бир дугаар кээп турар. «Мооң мурнунда саң салыр езулалга чүгле эр улус киржир деп бодап чораан мен. Бөгүн билип алганым болза, хамнарның эрттирип турар езулалынга херээжен улус база киржип болур. Ынчангаш чылдың-на маңаа кээр бодап тур мен» – деп, ол чугаалаан.
Хамнар күзелдиг кижи бүрүзүн кызыл сөөскенден кылган хам кымчы-биле арыглап домнаап турган.
Приморск крайның Находка хоорайдан келген хам Андрей Мезенин Тывада ук хемчегге бир дугаар киржип турар. Кожавыс Хакасияга саң салыр езулалдарда каш-даа катап киришкен. «Саң салыр езулал соонда, эртенги хүннүң херелдерин уткуур бис. Хамнаашкын кижиниң дыка хөй күжүн алыр. Кадыкшылымның байдалы чүгээр болза, Шагааның хөй-ниити хөглээшкиннерин сонуургап көөр мен.
Саң салыр езулалга келген чони оран-таңдыга чалбарып, сагыш-сеткилин арыглап алганнар.
