Орук объектилери часкы үерлээшкинге белен

Тываның орук-транспорт яамызы орук инфраструктуразының объектилери часкы үерлээшкинге беленин дыңнаткан.

Часкы суг үеринге Тыва Республиканың орук-транспорт комплекизиниң яамызы белеткенип турар. Тываның орук-транспорт комплекизиниң сайыды Шораан Чыргал-оол, хенертен чылып кээр болза, харыысалгалыг шупту албан черлери кандыг-даа байдалга белен болуп, үерлээшкинге удур хемчеглерни шапкынчытканын чугаалаан.

– Бо кыжын республиканың шупту кожууннарынга хар улуг дүшкен, орукчулар дүн-хүн дивейн ажылдаан. Суг үеринге удур хемчеглерни чорудуп, техниканы, материалдарны белеткээн – деп, сайыт айыткан.

2019 база 2020 чылдың чазын, дагдан харлар эрип баткаш, чер иштиниң суглары көдүрлүп, сугур чаъстар эрткени-биле, Тываның орук четкизи часкы суг үерниң үезинде берге шылгалданы эрткенин сагындыраал. Орук-транспорт яамызының дыңнадыы-биле алырга, ынчан ниитизи-биле 19 километр автомобиль оруктары, 32 көвүрүг кежиглер когараан.

Бөгүнде үрелген ол автомобиль оруктары биле көвүрүглерниң шуптузун катап тургускан, оон аңгыда дажый берген хем суунга алыспас кылдыр Аянгаты, Чоза база Барлык хемнерни кежир көвүрүглерни бедидир туткан.

Чоза хемни кежир көвүрүгнү эрткен чылын эде туткан болза, Аянгаты хемде көвүрүг тудуу доостур чадазында. 2023 чылда Барлык көвүрүүнүң тудуунче федералдыг бюджеттен 64 сая рубльди тускайлаан. Аварийлиг көвүрүгден ырак эвесте түр үениң демир кежии-биле шимчээшкин чоруп турар.

Суг үериниң үезинде үрелип болур орук участоктарын быжыглаар ажылдар чоруп турар: хоорзаларын алгыдып, орук кыдыының довураан улгаттырган. Баян-Кол биле Шамбалыг суурларже кирер оруктарда, Кызыл – Сарыг-Сеп, Хандагайты – Ак-Чыраа, Хандагайты – Мугур-Аксы, Бай-Хаак – Чал-Кежиг, Самагалдай – Ак-Чыраа, Шагаан-Арыг – Эйлиг-Хем автооруктарның кырыкы шывыын быжыглаан. Кара-Хаак суурже кирер орукта, Самагалтай – Ак-Чыраа база Хандагайты – Мугур-Аксы автооруктарда суг эрттирер хоорзаларны салган. Арыскан, Иштии-хем, Шеми база Хорум-Даг суурларже кирер оруктарда, Бүрен-Аксы – Элегес-Аксы – Кунгуртуг автокыштагда орукту септеп, ыяш көвүрүглерниң эрттирилге күчүзүн улгаттырган.

Россияның Онза байдалдар яамызының Тывада Кол эргелелиниң тускай мергежилдиглери регионнуң баштыңы Владислав Ховалыгның чогуур даалгазын күүседири-биле, хар эрип бадарга база хемнер ажыттынарга сугга алзып болур айыылдыг девискээрлерни февраль эгезинде-ле тодаратканын сагындыраал. Оларның санында 12 чавыс көвүрүглер база автомобиль оруктарының ол хире участоктары бар.