Бии-Хем кожууннуң Сесерлиг сумузундан «Чаа сорук» төлевилелиниң киржикчилери – Омак, Анжелика Маадылар. Олар 200 төрүүр хойнуң орнунга 20 инекти 2021 чылда алган турган.
Маадылар кыштаан одар-белчиири четчир Оттук-Даш деп черде тудуп алганнар.
– Кышты хүр ажары-биле мал чемин четчир кылдыр белеткеп алыр бис. Бо чылгы кыш берге эрткен, каш малывыс чудаан. Мал эмчилери доктаамал кээп, инектеривистиң деңгелин хынап, халдавырлыг аарыгларга удур тарылганы салып турар.
Мал оолдаашкынынга хамаарыштыр алыр болза, бо чылын эр бызаалар хөй болган. Малывыстың баш санын өстүрер сорулга салдынган болганда, бызааларны кыс бызааларга орнаар бис.
Улуг оглувус тускай шериг операциязынче долу эвес мөөңнээшкин-биле кыйгырткан. Ол дайынчы хөделиишкиннер девискээринде шериг албан-хүлээлгезин күүседип турар. Ортунувус сургуул, хеймери школачы – деп, өгнүң эр ээзи чугаалады.
Маадылар хүн батареяларын садып алган, ооң күчүзү сайгылгаан кыпсырынга, телефон октаарынга четчир. Малчыннар саан үезинде өреме, ээжегей, саржагны белеткеп алыр чаңчылдыг.
Бии-Хем кожуундан «Кыштаг» болгаш «Чаа сорук» төлевилелдериниң 2021 чылдың киржикчилери керээ езугаар бода малды кожууннуң өнчүзүнче хүлээткен. Малчыннарның бода малын улаштыр «Аян-Агро» кызыгаарлаан харыысалгалыг ниитилелче дамчыдар.
Чуруктарны Шончалай Ховалыг тырттырган
