Бөгүн В.Көк-оол аттыг Национал хөгжүм-шии театрынга Тываның Баштыңының чаңчыл болган Чаа чыл елказы болуп эрткен. Ийи аңгы бөлүктээн байырлал республиканың аңгы-аңгы булуңнарындан муң уругну хаара туткан.
ТР-ниң Чазак Даргазының оралакчызы Орлан Сарыглар Тываның Баштыңының мурнундан чыылган уругларга байыр чедиргеш, оларның күзелдери Чаа чылда шупту бүдерин, эки өөредилгени күзээн.
Бо удаада уруглар «Үш чүүл эртемниг оол» деп тыва улустуң тоолун сонуургап көргеннер. Байырлалдың ийиги кезээнде олар оюн-тоглаалыг көргүзүгге киржип, Соок-Ирей биле Харжыгаш база тоол маадырлары-биле кады ырлап-самнап, каас-чараш «хептиг» Шивини долгандыр ырлажып, хөглээннер.
Чалаттырган аалчыларның аразында Туранның бир дугаар школазының алдыгы классчызы Олеся Степанищева база бар. Ооң ачазы тускай шериг операциязының үезинде дайынчы албан-хүлээлгезин эрес-дидими-биле күүседип тургаш, маадырыы-биле амы-тынындан чарылган. Ө-бүле үш ажы-төлдүг, Олеся хеймери. "Бир дугаар театрга Чаа чылдың байырлалынга киржип келдим. Шии-даа, оюн-тоглаалыг көргүзүг-даа дыка солун-дур. Мында дыка хөй оолдар болгаш уруглар чыглып келген" - деп, ол өөрүшкүзү-биле үлешкен.
Чаа чылдың кол оюн-тоглаазынче салым-чаяанныг, эки өөредилгелиг өөреникчилерни, бичии спортчуларны, аңгы-аңгы олимпидалар, хөгжүм мөөрейлериниң тиилекчилерин, кадыкшылының байдалы-биле харык-шинээ кызыгаарлыг уругларны, тускай шериг операциязының киржикчилериниң, амыдыралдың берге байдалында таварышкан өг-бүлелерниң ажы-төлүн чалаан.
Каас-чараш идик-хептиг, маскарад костюмнарлыг оолдар, уруглар оюннарга киржип, чигирзиг «шаңналдарны» ойнап ап турганнар. Чаа чыл байырлалының шупту киржикчилеринге белектерни үлээн.
