Тывага политиктиг шаажылалдар музейиниң тургустунганының 30 чылдаанынга тураскааткан "Сактыышкын – үеден күштуг!" деп төгерик стол ТР-ниң Алдан-Маадыр аттыг национал музейиниң хуралдаар залынга болуп эрткен.
Киржикчилерни бүрүткеп турда, залда хүннүң айтырыынга дүгжүр кылдыр делелге – тускай дерээн булуңнуң таныштырылгазын Тываның национал музейиниң Кызылда политиктиг шаажылалдар төөгүзүнүң салбыр эргелекчизи Шолбан Ооржак чыылганнарга кылып, тайылбырны чедингир, барымдааларга даянып чугаалап турду.
Тываның Чазааның чанында гуманитарлыг болгаш социал-экономиктиг шинчилелдер институдунуң директору, төөгү эртемнериниң кандидады Вячеслав Март-оол, Тываның национал музейниң директорунуң оралакчызы Светлана Тулуш чыылганнарга байыр чедириишкининиң сөстерин дамчыткаш, эрткен чүс чылдың каржы дошкун, коргунчуг чылдарының салдарының дугайында сактыышкыннарны чугаалааннар.
Тываның гуманитарлыг шинчилелдер институдунуң директорунуң оралакчызы, төөгү эртемнериниң кандидады Оттук Иргит "Тывага политиктиг шаажылалдар: төөгү, кижилер, барымдаалар" деп илеткелди, Тывага "Буянныглар" ниитилелин политиктиг шаажылалдарга таварышканнарның ажы-төлү, чоок кижилериниң тургусканының төөгүзү" деп илеткелди институттуң шажын секторунуң эргелкчизи, шажын эртемнериниң доктору Ульяна Бичелдей "Политиктиг шаажылалдар төөгүзүнүң музейи: Төөгү болгаш амгы үе» деп илеткелди Енисей-Сибирьниң чурт-шинчилекчилериниң кежигүнү, Тывада "Буянныглар"ниитилелиниң директору, Политиктиг шаажылалдар төөгүзүнүң салбыр эргелекчизи эргелекчизи Шолбан Ооржак, "Сат Чурмит-Дажы болгаш үе" деп илеткелди "Тыва Республиканың Национал музейиниң кол шыгжакчызы, Тываның культуразының алдарлыг ажылдакчызы Роланда Ховалыг кылган.
Илеткелдер соонда Тываның кооперация болгаш эрге-хоойлу техникумунуң сургуулдары, чыылганнарның аразынга айтырыг-харыы хевиринге төөгүнүң эрткен үезинче ханылап, сайгарылгалыг чугааны чоруткан.
Тывага тургустунганындан бээр 30 чыл болган музей салбырының даргазынга суй белектер кылдыр Тываның төөгүзүн чыгган номнарны тывыскан.
Тываның национал музейиниң аңгы-аңгы кожууннарда музей салбырының даргаларынга юбилейлиг медальдар болгаш өөрүп четтиргенинин илередиглерин бижээн ажык чагааларны тывыскан.
Политиктиг шаажылалдар төөгүзүнүң салбырындан эрги экспозициялар болгаш хемчегден Вячеслав Монгуштуң тырттырган чуруктарын киирген.
