Президент Владимир Путин-биле “Чугула чүүлдер дугайында чугааның” киржикчилери «Артекке» дыштанган

Россияның Президентизи Владимир Путин бистиң республикага кээп чорда, «Чугула чүүлдер дугайында чугаалар» деп ажык кичээлге киришкен, Тывадан 35 школачының «Артек» делегейниң уруглар төвүнге дыштанылгазы дооступ турар. Россияның өөредилге сайыды Сергей Кравцовтуң чалааны-биле уруглар ноябрь 13-тен декабрь 3-ке чедир сураглыг төпте дыштанып турарын сагындыраал.

Артекте «Бистиң шилип алган оруктарывыс» деп кыйгырыг-биле чоруп турар 13-кү тускай угланыышкынныг сменаже тыва школачылар кирген. Уругларны аңгы-аңгы бөлүктерже чарып, башкылар оларга 21 хонук дургузунда делгереңгей программаны белеткээн.

Школачылар бо неделялар дургузунда аңгы-аңгы ажылдарга боттарын шенеп, керамика, авиамоделирование, ус-дааранылга, флористика дээш, оон-даа өске уруглар студияларынга мастерлерниң рольдарын шенеп көргеннер. Уруглар культурлуг экскурсияларга, походтарга киржип, солун кижилер-биле ужуражып танышканнар. Кежээниң-не эртип турар культура-маасалыг чыыштарны сонуурганнар.

Тываның Баштыңы Владислав Ховалыг бистиң республикавысты төлептиг төлээлээн болгаш чаа билиглерниң долу чүъгү-биле чүгленип, Россияның өске регионнарындан эш-өөрнү тып, солун кылдыр дыштанган уругларның чуруктарын бодунуң блогунда салган. «Шилип алган оруктарывыс» деп дыштанылга ээлчээ уругларның амыдыралынга уттундурбас кылдыр артып каар дээрзинге бүзүрээр мен» - деп, ол бижээн.

Тыва школачыларга бо болуушкун шынап-ла улуг төөгүлүг. Россияның Өөредилге яамызы Кызылдың Ада-чурттуң Маадырлары аттыг 20 дугаар школазынга Билиглер хүнүнде чурттуң Президентизи Владимир Путинниң эрттиргени «Чугула чүүлдер дугайында чугаа» деп кичээлдиң киржикчилеринге путевкаларны берген. Шупту уруглар бо төөгүлүг болуушкунну эрттирбейн, дыштаныр черинге эки чеде бээр кылдыр, оларның дыштаныр черинче оруунуң өртээн төлеп берген. Элээн каш уругларның ада-иелери оларга ындыг дузаны чедирер дугайында дилегни Тываның Баштыңынче киирген соонда, Владислав Ховалыг ооң дугайында айтыышкынны берген.

Тывадан салым-чаяанныг школачылар, хөй ажы-төлдүг өг-бүлелерниң база тускай шериг операциязының киржикчилериниң уруглары дээш, 25 уруг “Артектиң” ол-ла сменазынга дыштанып турган.

Тывага 2023/24 өөредилге чылы күрүне баштыңының киржилгези-биле эгелээн. Владимир Путинниң эрттиргени ажык кичээл үезинде өөреникчилер тускай шериг операциязының киржикчилерин деткииринден эгелээш, Президентиниң ажыл графиги, туризмниң хөгжүлдези, уругларның дыштанылга лагерьлерин тудары болгаш школага даштыкы дылдар өөредилгезинге чедир, аңгы-аңгы темаларны сонуургаан.

«Өөредилге» национал төлевилел күүселдези-биле туттунган 825 олуттуг Ада-чурттуң Маадырлары аттыг 20 дугаар школага бирги кичээл – Президентиниң «Чугула чүүлдер дугайында чугаа» деп кичээли болган. Хоорайның хемниң оң талакы кезээ – Вавилин ээтпээ микрорайонда школаны бо чылын ажыткан. Чаа школаның ажыттынганы – найысылалдың өске школаларынга өөренип турганнар дээш, шупту 1300 ажыг школачыга бажыңынга чоок черге шынарлыг өөредилгени алыр арганы берген.