«Профессионалитет» төлевилел-биле тускай мергежилдиглерни өөредир

Тываның Баштыңы Владислав Ховалыг «Эльбрусметалл» акционерлиг ниитилелдиң чиңгине директору Евгений Балуков-биле ужуражылга үезинде «Профессионалитет» федералдыг төлевилел-биле тус черниң тускай мергежилдиглерин өөредип, бүдүрүлгени кадрлар-биле хандырарын чугаалашкан. «Эльбрусметалл» компания үжен чыл дургузунда Эрзин кожуунда Тастыгдан чыдынын шиңгээдир чөпшээрелди алган.

Бо чылын Петербургтуң экономиктиг делегей шуулганынгың үезинде чарган дугуржулга езугаар, республиканың эрге-чагыргазы инвесторга төлевилел боттандырыышкынынга таарымчалыг байдалдарны тургузуп, ооң иштинде үндүрүг чиигелделерин бээрин боттарында хүлээнген. Компания, бодунуң ээлчээнде, Тываның чурттакчыларын ажылче хаара тударын мурнады шиитпирлээрин (ажылдакчыларның ниити санының эвээш дизе 30 хуузу), ол ышкаш бодунуң бүдүрүлгезинге ажылдаар кижилерни тускай сорулгалыг өөредип алырын хүлээнген.

– Бо арга бистиң аныяктарывыска амгы үениң арга-дуржулгазын болгаш улуг бүдүрүлгелерге ажылдаарының магадылалын бээр. Бо чүүл инвесторларны кадрлар чедишпезинден хостаар болгаш Саян ындындан тускай мергежилдиглерни хаара тударының хереглелин эвээжедир – деп, Владислав Ховалыг демдеглээн.

«Эльбрусметалл» акционерлиг ниитилел Тываның Өөредилге яамызы-биле дугуржулганы чарып, «Профессионалитет» федералдыг төлевилелдиң албан езузу-биле партнеру апарганын Евгений Балуков дыңнаткан. 2025 чылда төлевилел езугаар, 2023 чылдан бээр регионда ажылдап турар көдээ ажыл-агый өөредилге-бүдүрүлге бөлүү-биле дөмей, чаа бөлүк – Ак-Довурактың даг техникумунуң баазазынга дагжылар бөлүү республикага ажыттынар. Өөредилге албан чери чаарттынган өөредилге программазын киирип, чаа дериг-херекселди тургузуп, цехтер болгаш лабораторияларны эде чаартыр.

Холдингтиң удуртукчузу чурттуң дээди өөредилге черлеринде дагжы мергежилдерде өөренип турар Тываның сургуулдарын практикаже база ажылче хүлээп алырынга беленин бадыткаан. Ол ышкаш өске регионнарның бүдүрүлгелеринде вахталап ажылдап турар республиканың чурттакчыларын хаара тударынга инвестор белен.