Район судунуң эң дээре парлалга секретары – Тана Сарыглар

ТР-ниң Дээди Судунга 2021 чылда республиканың судтарының ажыл-чорудулгазын түңнээн хуралга “Тыва Республиканың эң дээре суду” мөөрейниң тиилекчилерин шаңнап-мактаан.

Хөй составтыг судтар аразынга “Тыва Республиканың эң дээре суду” шаңналга бирги черни Барыын-Хемчиктиң район суду алган. “Район судунуң эң дээре парлалга секретары” шаңналга база-ла Барыын-Хемчиктиң район судунуң төлээзи бирги черге төлептиг болган.

Барыын-Хемчиктиң район судунуң даргазының дузалакчызы Тана Сарыглар район судунуң 24 тускай үндүрүлгезин, 140 чүүлдү парлаарынга белеткээн, судтуң албан езузунуң сайтызынга 123 медээни парлаан болгаш 46 хөй-ниити хемчегни эрттирген.

Барыын-Хемчиктиң район судунуң тускай үндүрүлгезин бүгү-российжи парлалга албан черлериниң аразынга мөөрейже чоруткан турган. Аңаа Тана Сарыгларны тускай шаңнал-биле демдеглээн.

– Барыын-Хемчиктиң район судунда 2011 чылдан тура ажылдап тур мен. Амгы үеде суд даргазының албан-хүлээлгезин Светлана Манчыылай күүседип турар. Судтуң 500 кезек солунун айда ийи катап үндүрүп турар бис. Солунга судтуң ажыл-чорудулгазының дугайында материалдарны менден өске бүдүн коллектив чыып, бижип турар. “Суд залындан”, “Хоойлу-дүрүм медээлери” дээш оон-даа өске рубрикалар бар. Инженеривис Аяна Ооржак солунну чыскаап, техниктиг талазын харыылаап турар.

Ол ышкаш кожууннуң назы четпээн уругларынга корум-чурумга удур хемчеглерни эрттирип, школаже үнүүшкүннерни кылып, судче экскурсияладып-даа турар бис. Олар шииткекчи, прокурор, болчукчу болуп, “суд хуралын” эрттирип турарлар – деп, Барыын-Хемчиктиң район судунуң даргазының дузалакчызы ажылын кысказы-биле таныштырган.

Барыын-Хемчиктиң район суду кол кичээнгейни элээди уруглар аразынга эрге-хоойлу талазы-биле билиглерин бедидеринче болгаш кем-херек үүлгедиглерин болдурбазы-биле хемчеглерже угландырып турар.

Тана Сарыглар Кызыл-Мажалык чурттуг. Ооң баштайгы эртеми – башкы. Ол Кызыл-Мажалыктың бир дугаар школазын дооскаш, дээди эртем чедип алгаш, төрээн өөредилге черинге ажылчын базымнарын эгелээн. Улаштыр бот-өөредилге-биле Томскиниң күрүне университединге юрист мергежилге өөренип алган. Район судунуң эң дээре парлалга секретары үш оолдуг.

Хуралга республиканың массалыг информация чепсектериниң журналистериниң аразынга эрттирген «Хоойлу болгаш ниитилел» мөөрейниң тиилекчилерин база шаңнаан. Чогаадыкчы мөөрейниң комиссиязы судтарның ажыл-чорудулгазын чырыткан 150 ажылды база чеди сюжетти үнелеп көрген. Тергииннерниң аразында “Тувамедиагрупп” медээ агентилелиниң журнализи Шончалай Ховалыг база кирген. Ол бирги черге төлептиг болган.