Тываның Баштыңы Владислав Ховалыг өөредилге объектилерин чаартыр программаны боттандырып турар төлевилел организациязының төлээлери база чогуур яамылар болгаш албан черлер удуртукчулары-биле хуралды эрттирген.
Хурал үезинде ажылдар амгы үеде кайы хире чоруп турарын база республиканың өөредилге черлеринде инфратургузугну оон-даа хөгжүдер дээш регионалдыг-даа, федералдыг-даа деңнелге шиитпирлээр ужурлуг айтырыгларны чугаалашкан.
Владислав Ховалыг хуралдың шиитпири-биле 2026 чылда Ак-Довурактың 3 дугаар школазынга үндезин септелге чорудары планнаттынган деп, бодунуң телеграм каналынга дыңнаткан. Ниити билиг школазы 1983 чылдың август айда ажыттынган. Эрткен чылдарда 700 хире өөреникчи өөренип турар дөрт каът улуг школага чаңгыс-даа улуг септелге кылбаан.
Сөөлгү чылдарда национал төлевилелдер болгаш федералдыг программаларны күүселдези-биле республиканың өөредилге черлериниң инфраструктуразын көскүзү-биле экижиткенин Тываның Баштыңы сагындырган.
«2022 чылдан бээр «Өөредилге», «Аныяктар болгаш уруглар» национал төлевилелдерниң, ол ышкаш «Көдээ суурларның комплекстиг хөгжүлдези» федералдыг программа күүселдези-биле, Тывада 11 чаа школа туттурган. Бөгүнде уруглар амгы үениң бүгү-ле негелделеринге дүгжүп турар улуг делгем школаларда өөренип турар. Бо чылын ыраккы болгаш чедери берге Мөңгүн-Тайга кожууннуң Кызыл-Хая суурда чаа школа тудуун доозар. Оон аңгыда школаларга капитал септелге кылыр программаже 50 объектини кииргеш, бөгүнде оларны бүрүнү-блие чаартып, дерээн бис» – деп, Тываның Баштыңы бижээн.
Хуралдың киржикчилери аварийлиг байдалда школаларны база чугаалашкан. Шуй, Ээрбек, Черби, Аяңгаты, Ишкин, Торгалыг суурларда эвээш санныг өөреникчилерлиг ниити өөредилге албан черлериниң оран-савалары шак ындыг школаларга хамааржыр. Ооң-биле чергелештир, чурттакчы чоннуң саны көвүдеп турар чамдык кожуун төптеринде школаның шөлү чедишпестеп эгелээнин демдеглээн.
Тываның Баштыңы ол айтырыгны шиитпирлээри-биле, эвээш комплектилиг школалар тудар план барын дыңнаткан. Шак ындыг өөредилге черлерин тудар төлевилелдер ажылы эрткен чылын-на эгелээн болгаш, бо удаада дөзевилекчилер боттарының саналдарын республиканың удуртукчузунга таныштырган.
«Школа өөредилге системаларын чаартыры» деп федералдыг программа күүселдези-биле 2022 болгаш 2023 чылдарда Ак-Довуракта ийи ниити өөредилге албан черинге – 1 дугаар школага база «Өлчей» лицейинге үндезин септелгелерни чорутканын демдеглезе чогуур.
Тываның эрге-чагыргазы 2030 чылга чедир республикада ам-даа 13 школага үндезин септелгени чорударын планнаан. 2025 чылдан эгелеп «Аныяктар болгаш уруглар» национал төлевилелдиң «Уругларга бүгү-ле экини» федералдыг программазы езугаар өөредилге адырында инфратургузугну чаартыр төлевилелдерни боттандырар. 2025 чылда бо программа күүселдези-биле Тываның Хову-Аксы, Терлиг-Хая, Бора-Тайга, Чыргаланды, Сукпак, Аксы-Барлык, Кызыл-Даг суурларда чеди школага үндезин септелгелерни кылган.
