Национал школа хөгжүдер институттуң ажылдакчылары ажы-төлдүң тыва дылды билириниң деңнелин шинчилээр ажылды уламчылаары-биле Кызыл-Мажалыктың 1 дугаар школазынга, Ак-Довурактың «Ѳлчей» лицейинге база «Тоол» уруглар садынга четкенин институт дыңнаткан.
"Өлчей" лицейинге тыва дыл, чогаал, улусчу ужурлар башкыларынга, класс удуртукчуларынга база уруглар садтарының кижизидикчи башкыларынга республика чергелиг "Тургузукчу күш-ажыл болгаш өг-бүлениң ыдыктыг чүүлдери" деп методиктиг семинарны эрттирген.
Семинарга институттуң ажылдакчылары «Өг-бүлеге тоолдажыры болгаш төөгүлежири», «Маадырлыг тоолдарда кыс кижиниң овур-хевири», «Уругларны күш-ажылга кижизидери», «Өг-бүлениң архивин тургузары», «"Эртемни - чаштарга" төлевилел. Ада-иелер-биле ажыл» деп солун темаларга илеткелдерни кылган. Дыңнадыг бүрүзү өг-бүле кижизидилгезиниң айтырыгларынче угланган.
Кожууннуң башкылары мындыг хевирлиг үнүүшкүннүг семинарның ажыктыын демдеглеп, четтиргенин илереткеннер.
