Тывада чиигелделиг ипотека программазынга Ажаалга банкызының соонда, бо айда Росбанк каттышкан. Банк сентябрьның 25-тен ийи хууга ипотека бээринге чагыгларны хүлээп эгелээн болза, октябрьда бодунуң клиентилери-биле ставказы бичии бирги керээлерни чарып эгелээн.
Росбанкының "Кызыл" немелде офизиниң эргелекчизи Ирина Митюкова Тываның чиигелделиг ипотеказын өске регионнарның чурттакчылары база сонуургап турарын дыңнаткан. Чиигелделиг тыва ипотека-биле республика девискээринде шимчевес өнчүнүң чүгле бирги рыногундан бажыңны садып ап болурун сагындырып каалыңар.
– Дыка хөй кижилер сонуургап турар, ийе. Ийи хуу дээрге, дыка эки. Негелделер езугаар ону бээринде кызыгаарлаашкыннар чок, РФ-тиң хамаатызы ону ап болур. ДОМ.РФ-те аккредитациялыг тудуг черлери-биле ажылдап турар бис, чиигелделиг ипотека негелделеринге тааржыр клиентилерге шимчевес өнчүнү көөр кылдыр саналдаар – деп, Ирина Митюкова чугаалаан.
Росбанкының негелделери Ажаалга банкызының саналдары-биле дүгжүп турар: 3 чылдан 20 чыл чедир хуусаага 2 хуу кол ставкалыг 300 000-дан 6 сая чедир рубль ипотека чээлизин бээр. Росбанкының эгеки дадывырының эвээш хуузу – 20,1. Чамдык негелделерге дүүштүр кол ставканы эвээжедир арга база бар.
– Клиент бистиң банкының немелде опциялары-биле хуулуг ставказын бичеледип ап болур. Квартираларга 0,25 хуу, хоорайдан дашкаар шимчевес өнчүге – 0,15 хуу чедир. Ол чамдык чылдагааннардан база хамааржыр. Чижээ, чээли алыкчызының шилип алганы керээзиниң негелделери, баштайгы дадывырының хемчээли, банкыда шалың акшазының агар санының бары дээш, оон-даа өске. Кижи бүрүзүнге немелде опциялар аңгы-аңгы болур. Бөгүнден эгелээш программа төнгүжеге, азы 2024 чылдың июнь 30-ге чедир, чиигелделиг ипотека чээлизин берип ажылдаар бис – деп, Ирина Митюкова тайылбырлаан.
Росбанк "Тываның ипотеказы" программа боттандырылгазы-биле белен азы тудуп турар бажыңнарга – квартира азы эвээш каъттыг бажыңнарлыг чуртталга комплекизинде чер участоктуг хууда чуртталга бажыңынга ипотека керээлерин чарар.
Тываның Чазаа бистиң регионга чиигелделиг ипотека программазын деткиирин федералдыг төпке ийи чыл дургузунда камгалап келген. Россияның Чазааның даргазы Михаил Мишустин бо чылдың июльда республика чонунуң манааны доктаалга атты салган.
В Тандинском районе проинспектировали ход строительства объектов
Сегодня в рамках рабочего визита заместитель Председателя Правительства Республики Тыва Айдын Чюдюк совместно с первым заместителем министра строительства Тувы Салимом Санчы и директором ГКУ «Госстро…