Тываның сайгарлыкчыларынга Wildberries маркетплейске боттарының барааннарын садып-сайгарар база реклама кылыр чаа аргалар тывылган. Ол ышкаш российжи бизнести бүгү тала-биле деткиир база хөгжүдер «Өзүлдениң шөлү» төлевилелдиң логистика ачы-дузаларын болгаш өөредилгезин ажыглаар аргалыг апаар.
Тываның Баштыңы Владислав Ховалыг Санкт-Петербургтуң делегей чергелиг экономиктиг шуулганының шөлүнге, РВБ-ниң (Wildberries & Russ каттышкан компания) баштыңы база үндезилекчизи Татьяна Ким-биле ужурашкаш, республикага бо төлевилелди ажылдадып эгелээриниң дугайында чугаалашкан.
Wildberries & Russ компания президентиниң төлевилел офизи «Стратегтиг эгелээшкиннер агентилели»-биле кады "Өзүлде шөлүн" тургузарын саналдаан.
«Татьяна Владимировна бистиң республикавыстың бот-тускайлаңын болгаш национал онзагайын сонуургап турар. Шөлдүң дузазы-биле сайгарлыкчыларга продукцияны хевирлээринге/бүдүреринге, ол ышкаш ону чаа деңнелче үндүреринге деткимче көргүзер күзелдиг» - деп, Владислав Ховалыг чугаалаан. Чоокку үеде кады ажылдажылга тодаргай билдинип кээрин ол дыңнаткан.
Компанияның төлээлери тус черниң сайгарлыкчылары-биле ужуражып, тодаргай хемчеглер планын ажылдап кылыры-биле Тываже кээриниң дугайында дугуржулганы кылган.
Тываның Баштыңы РВБ-ниң удуртукчузу-биле ужуражылга үезинде регионнуң күчү-шыдалының курлавыры – бо үеде херек кожа-хелбээ чурттарда дүрген хөгжүп турар чугула ажыл-чорудулгалар дугайында чугаалаан. Тыва кызыгаар регион болганда, Моол база Кыдаттың барыын регионнары болгаш можулары-биле садыг-сайгарылга харылзааларын хөгжүдеринге улуг аргаларлыг дээрзин демдеглээн.
«Кызыгаарлар таварып эртер оруктарны чаагайжыдар, Моол-биле кызыгаарда «Хандагайты» эрттирилге пунктузунда эде тудуушкун төлевилелдерин айыттым. Логистика талазы-биле кады шиитпирлээр айтырыгларны ажылдап кылырын уламчылаар бис» - деп, ол немээн.
«Өзүлде шөлү» төлевилелдиң кол сорулгазы – Россияның регионнарында сайгарлыкчы идепкейни деткиири, российжи бараан бүдүрүлгезиниң хемчээлин көвүдедири болгаш чуртта бизнести хөгжүдеринге таарымчалыг байдалдарны тургузарынче кичээнгейни улгаттырары. Төлевилелди 2024 чылдың декабрьда эгелээн, а 2025 чылдың январьда Стратегтиг эгелээшкиннер агентилелиниң хайгааракчы чөвүлелиниң хуралынга Россияның Президентизи Владимир Путинге таныштырган.
«Өзүлде шөлү» регионалдыг брендилерге бедик технологиялыг чурагайлыг садыг-сайгарылга шөлүнүң инфратургузуг деткимчезиниң комплекстиг хемчеглерин болгаш тускай ажыглаар аргаларын бээр. Төлевилелдиң киржикчилери боттарының барааннарын бүдүрүп, садыг-сайгарылганың чаа арга-хевирлерин ажыглаарынче, ол ышкаш оларны сайзырадырының болгаш таныштырарының чаа деңнелинче үндүрер.
Бо хүнге чедир Чукоткадан Калининградка чедир, Россияның аңгы-аңгы регионнарындан 300 ажыг база Узбекистандан 100 ажыг ылгавыр демдек «Өзүлде шөлүнче» кирген. Wildberries-те «Өзүлде шөлүнде» киржикчи компанияларның садыг-сайгарылгазы эрткен чылдың ол үезинге деңнээрге, 68 ажыг хуу өскен.
