Бо неделяда чуртувустуң кол күрүне байырлалдарының бирээзи – Россия хүнүн демдеглээр. Өске регионнарда ышкаш, Тываның чурттакчылары база кыска ажылчын неделяда, понедельниктен средага чедир, ажылдаар.
1990 чылда РСФСР-ниң күрүне бот-догуннаашкынының дугайында декларацияны хүлээп алган хүн – июнь 12-де Россия хүнүн демдеглеп турар. Ол хүн чурттуң Президентизи Кремльге Россия Федерациязының күрүне шаңналдарын тыпсыр, а Кызыл шөлге байырлал хемчеглери эртип, байырлыг салют-биле доостур.
Тываның шупту муниципалдыг тургузугларынга ада-чуртчу, культурлуг болгаш кижизидикчи 120 ажыг хемчег планнаттынган. Культура бажыңнары аңгы-аңгы темалыг делгелгелерни, беседаларны, байыр чедириишкиннерин, чадаг-тергелиг аян-чоруктарны, акциялар, квесттерни, челленджтерни, чурук болгаш шүлүк мөөрейлерин организастап эрттирер.
Чурттакчылар аңгы-аңгы оюн-тоглаалыг болгаш интеллектуалдыг программаларга, флешмобтарга, ада-чуртчу шактарга киржир. Чер-черлерге байырлал концерттери болур. Хүндүскү лагерьлер уругларга викториналар, үлегер домактар болгаш асфальт кырынга чуруктар мөөрейлерин планнаан. Уруглар «Россияның көзенээ» бүгү-российжи акцияга киржир. Тус чер чагырга органнарынга ажык эжиктер хүннери болуп эртер.
Июнь 12-де республиканың төвүнде Арат шөлүнге албан езунуң хемчеглери болур.
10:00 шакта – Россия Федерациязы биле Тыва Республиканың күрүне туктарын көдүрер езулал. 14 хар четкен хамаатыларга паспорттарны байырлыг байдалга тыпсыр.
13:00 - 17:00 шакта – Россия хүнүнге тураскааткан фотоделгелгени база тус черниң бараан бүдүрүкчүлериниң база ус-шеверлерниң ярмарка-садыглаашкыны болур. Тыва Республиканың күүсекчи эрге-чагырга органнарының шөлдеринге юридиктиг халас дуза чедирер консультация пунктуларын организастаар. Ол ышкаш керээ-биле шериг албан-хүлээлгезинче пунктузу ажылдаар.
18:00 - 20:00 шакта – Арат шөлүнге Кызылдың база республиканың чогаадыкчы коллективтери болгаш тулган дээн күүседикчилерниң концерти-биле байырлал доостур.
