Россияның төвү Москва хоорайга Чоннуң ажыл-агыйының чедиишкиннериниң «Россия» көрүлде-делгелгезинге Өөредилгениң хүнү эрткенин Национал школа хөгжүдер институт дыңнаткан.
Россияның шупту регионнары боттарының өөредилге системазында «Өөредилге» национал болгаш «Профессионалитет» федералдыг төлевилелдерни боттандырып турар көскү чедиишкиннерин база регион бүрүзүнүң онзагай талаларын көргүзүп келген.
Тываның делгелге-стендизинге ТР-ниң Өөредилге яамызының мурнундан Национал школа хөгжүдер институттуң тыва филология лабораториязының эргелекчизи В.В. Монгуш делегацияның ажылынга институтту төлээлеп киришкен.
Регионнуң онзагайы болгаш өөредилгениң этнокультурлуг ужур-утказының дугайында келген аалчыларга сонуургадып, «Тыва дыл – чаштарга», «Тыва улустуң оюннары – уругларга» деп төлевилелдерни таныштырган.
Тыва оюннарны келген чон аажок сонуургап, улуг кижилер-даа, чалыы-даа, элээдилер-даа оюннарга идепкейлиг киришкен. Кажыктар-биле оюннар оларның сонуургалын хаара туткан.
Делегацияны өөредилге сайыды Елена Хардикова удуртуп, Тываның өөредилге системазы-биле келген аалчыларны таныштырган. Ол ышкаш сайыттың оралакчызы О. Г. Якушева делгелгениң ажылынга киржип, республиканың өөредилге адырында ажыл-чорудулганы таныштырган.
