Ю.Ш. Күнзегеш аттыг Тываның ном үндүрер чериниң үндүргени Бичен Ондарның «Тываның черлер аттарының географтыг словары» база Иргит Самбунуң «Тыва улусчу оюннар» деп номнары Россияның ном үндүрүкчүлериниң ассоциациязының «Чылдың тергиин номнары» бүгү-российжи мөөрейиниң түңнелдери-биле Россияда 50 тергиин регион үндүрүлгелериниң санынче кирген.
Кызыл шөлге эрткен XI Ном фестивалының кыска допчулалынче «Тываның черлер аттарының географтыг словары» («Тываның топонимиктиг словары») кирип, профессионал мөөрейниң дипломнарынга төлептиг болган.
Тываның Баштыңы Владислав Ховалыг тургустунганындан бээр 95 чыл оюн бо чылын демдеглеп турар ном үндүрер черниң чедиишкинниг ажылын демдеглээн. «Бо чедиишкиннер – Юрий Күнзегеш аттыг Тываның ном үндүрер черниң кызымаккай ажылының түңнели-дир» – деп, Владислав Ховалыг бодунуң блогунда дыңнаткан.
Кол редактор Н.Ш. Куулар, үндүрүлгениң редактору Ш.Ш. Монгуш, өрүкчү Ч.М. Бегзи, дизайнер И.В. Принцев, техниктиг редактор В.Ч. Ховалыг словарьны парлалгаже белеткээн. А.А. Тюлюштюң чуруу ооң даштын каастаан.
2014 чылда темалыг номинацияларга үнген эки номнарны Россияның Ном үндүрүкчүлериниң Ассоциациязының профессионал эксперт чөвүлели шилээн. АСКИ-же чоруткан азы парлалгага үнген рецензияларны, ном саңының, тускай мергежилдиглерниң, номчукчуларның үнелелдерин көрүп, номнарны өөрени көөр. Мөөрейге «Тываның топонимиктиг словары» ийи номинацияга үнелелди алган, И. Самбунуң «Тыва улусчу оюннар» деп ному демдеглеттинген.
Россияның Ном үндүрүкчүлериниң Ассоциациязы Литературлуг аалчылар бажыңынга (Кол универсалдыг садыгда) “Кызыл шөл” деп российжи эң улуг ном фестивалының «Чылдың тергиин номнары» мөөрейиниң тиилекчилерин чарлап, шаңнаар езулалды эрттирген. Бүгү чурттуң ном үндүрер черлериниң профессионалдары аңаа чыылган.
«Чылдың тергиин номнары» бүгү-российжи мөөрей ном үндүрер черлерниң профессионал арга-дуржулгазының өзүлдезинге идигни берип, эң-не эки ажылдарны болгаш парлалга программаларын тодарадып база нептередип турар.
Россияның Ном үндүрүкчүлериниң Ассоциациязындан аңгыда, Россияның Камгалал яамызы, Хамаарышпас күрүнелер демнежилгезиниң херектериниң талазы-биле федералдыг агентилел, Националдар херектериниң талазы-биле федералдыг агентилел, «Орус делегей» фондузу, Россияның ном саңнарының ассоциациязы, Орус шериг-төөгү ниитилели, Хамаарышпас күрүнелерниң ном тарадыкчыларының ассоциациязы, Россияның Журналистер эвилели, Россияның Чогаалчылар эвилели, Орус Православ хүрээзиниң Ном үндүрер чөвүлели, Россия Федерациязының Садыг-үлетпүр палатазы, Москваның Чазааның массалыг информация чепсектери болгаш реклама департаментизи болгаш өске-даа черлер фестиавльдың деткикчилери болган.
Сөөлгү чылдарда Тываның ном үндүрер чериниң элээн каш төлевилелдери: Б. Будуптуң ийи дылда «Тыва чоннуң үлегер домактары болгаш тывызыктары», Г. Курбатскийниң «Тыва тывызыктары», «Шериг тоолдары», «Тыва. Болуушкуннар, фактылар, чоннар» деп чурук альбому Кызыл шөлде фестивальдың тулган номнар даңзызынче кирген.
