«Чедер» курорт-дыштанылга комплекизинге Аныяк (эгелеп чоруур) чогаалчыларның делегей чергелиг III фестивалы болуп эрткенин Национал школа хөгжүдер институт дыңнаткан. Аңаа Россияның Чогаалчылар эвилелиниң баштаар чериниң кежигүннери Валерий Латынин, Нина Попова, Афах Абдуллаева кээп, өөредилгелерни эрттирип, шылгарааннарны адап демдеглээн.
Шүлүк чогаалы (В. Латынин), калбак чогаал (А. Абдуллаева, Н. Попова) болгаш уругларга чогаал (Н. Попова) деп үш аңгы секцияга чарлып алгаш, теоретиктиг билиглерин херек кырында бадыткаанының түңнелинде алды кижини Россияның Чогаалчылар эвилелиниң кежигүнүнге кордакчы кылдыр шилээн.
Эрткен чылгы өөредилгелерниң түңнелинде Россияның Чогаалчылар эвилелиниң кежигүннери болган Нина Эртине (Түлүш), Юрий Дарбаа, Чаяна Шилова оларга бадылергейлерни байырлыг байдалга тывыскан.
Бо фестивальдың эгелекчизи Сайлыкмаа Комбу Тываның Чогаалчылар эвилелин 5 чыл удуртуп турган үезинде Россияның Чогаалчылар эвилели-биле сырый ажылдап, Россияның Чогаалчылар эвилелиниң кежигүннери болур 20 чогаалчыны белеткээн. Теоретиктиг билиглер-биле чепсегленген аңгы-аңгы назы-харлыг бижип эгелеп чоруур чогаалчыларның арга-дуржулгазын өстүрүп, үре-түңнелдиг ажылдаанын демдеглевес арга чок.
Хоочун башкы Лидия Ооржак, чогаалчы Сайлыкмаа Комбу биле Валерий Латынинниң белеткеп каан шүлүкчүлериниң ажылдарының шынарын эки дээрзин көрүп, сайгарылгаларга идепкейлиг киришкен.
Л. Ооржактың шүлүк чогаалын ханы сайгарып турарын Валерий Анатольевич эскерип көргеш, башкының ажылдарын көрбейн-даа, Россияның Чогаалчылар эвилелиниң кежигүнүнге төплептиг деп үнелээн. Шак ындыг үнелелди Национал школа хөгжүдер институттуң база бир ажылдакчызы, «Башкы» сеткүүлдүң кол редактору Эрес Кол база алган. Ол дээрге оларның барык-ла Россия чергелиг чогаалчы болганы ол, дараазында чада дээрге оларның бадылергей алырынга белеткели болур.
Институтка хамааржыр ийи чогаалчы Россияның Чогаалчылар эвилелиниң баштаар чериниң бедик үнелелин алганынга чоргаарланып, коллективи байыр чедирген.
