Россияның экономиктиг сайзырал сайыдының оралакчызы Денис Тюпышев Тывага ажыл-агыйжы сургакчылаашкын үезинде, тус черниң чиг эт болбаазырадылгазын сайзырадып, регионнуң тудуг адырын бодунуң продукциязы-биле хандырып турар бүдүрүлгелерни көрген.
Оралакчы сайыт ТР-ниң экономиктиг хөгжүлде болгаш үлетпүр сайыды Аяс Баян-биле кады «Сергеихинский текстиль» акционерлиг ниитилелдиң дүктүң бирги болбаазырадылга цегин база «Транснедро» демир-бетон заводун эргээннер.
Делегация «Сергеихинский текстиль» дүк болбаазырадылгазының ажылын көрген. Компания республиканың чурттакчыларындан чылда-ла 500 хире тонна чиг этти садып ап турар, ооң бүдүрүкчү күчү-күжү чылда 800 тонна чугган дүктү болбаазырадыр аргалыг.
Дүктү бүрүнү-биле болбаазырадырын чедип алыры – бүдүрүлгениң дараазында чадазы. Планда кидис, чылыг шывыг, чоорганнар база чүң бүдүрүп үндүрерин чедип алыры көрдүнген. Малчыннардан дүк садып алырындан эгелээш, белен продукцияны бүдүреринге чедир төлевилел күүселдези-биле Тывага долу күчүлүг бүдүрүлгени ажылдадыр. Бо чүүл тус черниң чиг эдинге чүгле немелде өртекти бээр эвес, а чаа ажылчын олуттарны тургузуп, малчыннарга садып-саарылганың турум рыногун хандырар.
Денис Тюпышев 2016 чылдан бээр бетон, тудуг холуксаалары, демир-бетон продукциязын бүдүрүп турар «Транснедро» демир-бетон бүдүрүлгезинге четкен. Бүдүрүлгениң кол угланыышкыннарының бирээзи – чуртталга тудуунга тускай үш каъттыг хана кезектерин бүдүрери. Оларның ажыглалы республиканың тудуг адырын бот бүдүрген амгы үениң материалдары-биле хандырып, өске регионнардан тудуг материалдарын сөөртүп эккээрин эвээжедир ужурлуг. Хана кезектерин бүдүрүлгези федералдыг төптен деткимчени алган. Бүдүрүлге Тыва Республиканың бот-тускай социал-экономиктиг хөгжүлде программазының акша-хөреңгизи-биле амгы үениң дериг-херекселдерин болгаш тускай техниканы садып алган.
Амгы үеде заводта 26 кижи ажылдап турар. 2028 чылга чедир ажылчыннар санын 35 чедир көвүдедип, бүдүрүлгениң хемчээлин база үндүрүг орулгаларын улгаттырары планнаттынган. Ол чорааш, бүдүрүлгени моон соңгаар хөгжүдериниң болгаш регионда чаа бүдүрүлге төлевилелдерин боттандырарының перспективаларын база сайгарып чугаалашкан.
