Тывага Россияның эртем хүнүнге тураскааткан шалыпчы айны хөй-ниити хемчеглери-биле демдеглеп эрттирер. Эртем билиглерин нептередиринче, аныяк эртемденнерни деткииринче, эртем-шинчилел ажылынче уругларны болгаш аныяктарны хаара тударынче угланган хөй-ниити, өөредилге болгаш чырыдыышкын хемчеглери республиканың чурттакчыларын манап турар.
Профессионал байырлалга тураскааткан кол хемчеглер аразында республиканың эртем албан черлеринге парлалга-турлары, «Тыва Республиканың тергиин аныяк эртемдени» мөөрей, эртем организацияларының чедиишкиннериниң делгелгези бар.
Февраль 6-да Кызылдың Улусчу чогаадылга бажыңынга байырлалдың кол кезээнге Тываның эртем адырында шылгараан ажылдакчыларны шаңнаар.
Кол эртем институттарынга база өөредилге организацияларынга "Ажык эжиктер" хүннери, экскурсиялар, лекциялар, эртемденнер-биле ужуражылгалар болуп эртер. Келген улус медицина, көдээ ажыл-агый, экология, гуманитарлыг болгаш техниктиг эртемнер талазы-биле амгы үениң шинчилелдерин билип, эртем лабораторияларының болгаш библиотекаларның ажылдары-биле таныжар. Эртем албан черлериниң албан езузунуң сайтыларында болгаш социал четкилерде арыннарында ол хүннерниң программаларын салган.
Школачыларга болгаш студентилерге угаан сайзырадыр оюннары, мастер-класстар, эртем тулчуушкуннары, квесттер, интерактивтиг оюннар база планнаттынган. Уруглар садтарынга болгаш школаларга уругларның эртемге сонуургалын оттурарынче угланган шенелделер, ажык кичээлдер, акциялар эртер.
Программаның аңгы кезээн сан-чурагайлыг технологияларга, ужудукчу чок ужар аппараттарга, эртем шинчилелдеринге кылымал угаанны ажыглаарынга тураскааткан. Бо бөлүктүң бир кезээ кылдыр школачылар аразынга программа чогаадырынга республика маргылдаазы база болуп эртер.
ТР-ниң Аныяк эртемденнер болгаш тускай мергежилдиглер эвилелиниң организастааны эртем албан черлериниң ажылдакчыларының спортчу спартакиадазы база эртем, өөредилге, бүдүрүлге аразында кады ажылдажылганың чугула айтырыгларын сайгарган “төгерик столдар” дээш, өске-даа спортчу база хөй-ниити эгелээшкиннерлиг хемчеглер-биле ол доостур.
