Россияның өөредилге сайыды Сергей Кравцов Тывага сургакчылап чораан үезинде, республикада өөредилге албан черлерин хынап көрген. Яамының удуртукчузу үндезин септелгелерни боду хынааш, башкыларга байырны чедирип, бүгү ортумак профессионал өөредилге системазынга хамаарышкан чугула саннар үлешкен.
Сергей Кравцовтуң Тывага келгениниң кол пунктузу – Тываның агроүлетпүр техникуму болган. «Аныяктар болгаш уруглар» национал төлевилел езугаар 2025-2026 чылдарда эде чаарттынган материал-техниктиг баазаларны сайыт хынаан. Бөгүнде 560 сургуулду хүлээп алыр өөредилге черинде үш оран-саваны: өөредилге корпузун болгаш ийи ниити чуртталга бажыңын үндезини-биле септээн.
Сайыт 2023 чылдан бээр «Профессионал» программазы-биле көдээ ажыл-агый кластеринге бааза шөлү болуп келген техникум кадрлар белеткээринге шынарлыг модельди көргүзүп турарын демдеглээн. Ажылдың аңгы-аңгы хевирлеринге 11 девискээрлиг өөредилге-бүдүрүлге төвүн ында туткан, а өөредилгени ажыл берикчилери-биле сырый чорудуп турар. Техникум чурагайлыг чер ажылын болгаш көдээ ажыл-агыйга ужудукчу чок агаар системаларын ажыглаарынче онза кичээнгейни салып турар. Хууда дузалал ажыл-агыйлары сургуулдарның теория кырында билиглерин быжыглаар. Техникум 332 гектар черлиг, 112 баш малдыг.
Россияның өөредилге сайыды бүгү чуртта ажылчын мергежилдерге сонуургал улгатканын демдеглээн. Сайыт инфратургузуг чаартылгазының улуг хемчээлдиг программазының дугайында чугаалап тура, Президентиниң даалгазы база «Чаңгыс демниг Россия» партияның деткимчези-биле ажыл чоруп турарын демдеглээн. «Бо чылын программаже 300 хире колледж тудугларын хаара туткан. Ооң иштинде Тыва Республиканың Балгазын суурда колледж-биле кады 16-зын септеп селээн» – деп, ол тайылбырлаан.
Д.Б. Ондар аттыг 22 дугаар ортумак школа – сайыттың сөөлгү доктааган чери болган. Аңаа Сергей Кравцов республиканың башкыларынга албан чериниң шаңналдарын тывыскан.
«Россия Федерациязының өөредилгезиниң алдарлыг ажылдакчызы» хүндүлүг атты «Аленушка» уруглар садының эргелекчизи Елена Мичинмаага тывыскан. Тываның Өөредилге яамызының килдис начальниги Светлана Монгуш «Хүндүлүг дагдыныкчы» хөрек демдээн, а Тываның көдээ ажыл-агый техникумунуң ажылдакчызы Любовь Денисюкка «Мергежилинге бердингени дээш» деп демдекти тывыскан.
Республикада школа өөредилгезиниң эде чаартылгазы шапкын темп-биле чоруп турарын демдеглезе чогуур. Сөөлгү чеди чылда Тывада школа назыны четпээн уруглар өөредилгезиниң чедингири 88 хуудан 95 хуу чедир өскен. 31 уруглар садын база 12 чаа школалар туттунган, а Чырыдыышкын яамызының деткимчези-биле Тыва 5-7 класстарга «Төрээн черивистиң төөгүзү» деп өөредилге номун ажылдап кылгаш, күрүнениң өөредилге ному деп эрге-байдалды алган.
