Ак-Довурак хоорайда уругларның чогаадылга бажыңының өөреникчилери 4 дугаар өрт-камгалал кезээнге четкенин республиканың немелде өөредилге сайзырадыр төвү дыңнаткан.
Уругларга өөредиглиг аян-чорукту кылган. Өрт чериниң ажылдакчылары камгалал угланыышкынныг мергежилдерниң дугайында тайылбырлап, уругларның айыыл-халапка удур билиглерин быжыглаан.
Уругларның экскурсиязынче профилактиктиг чугаа база кирген. Назы четпээн уругларга өртке удур айыыл чок чорук, онза байдалдарны чайладырының аргаларын, онза байдалдарда чугула кылыр ажылдар дугайында тайылбырлаан.
Школачыларга өртчүлерниң хүн бүрүде ажыл-ижиниң үезинде ажыглап турар техниказын көргүскен. Оолдар, уруглар камгалакчы база өртчү кижиниң ажылында тускай дериг-херекселдерни сонуургаан.
Шак мындыг ужуражылгалар уругларның кадыкшылы база амы-тыны дээш харыысалгалыг болурунга дузалыг. Ол ышкаш школачыларның келир үеде мергежил шилип алырынга сонуургалын хевирлээр.
