Бии-Хемниң Аржаан биле Хадын суурларда өртке удур айыыл чок чорукту хандырар талазы-биле ажылдар кылып эгелээнин кожууннуң чагырга даргазының хүлээлгезин күүседип турар Роман Васильев дыңнаткан.
Амгы үеде сумуларның кудуктар чанында үш куб метр доскаарларны тургузар оңгарларны каскаш, улуг саваны суг-биле долдурган. Онза байдалдар үезинде доскаарда шыгжаттынган суг курлавыры өрт өжүреринге эргежок херек дээрзи билдингир. Ооң ачызында өрттүң өөскүп үнген черин эге чадазында дарый өжүрер арга тургустунар.
Дараазында чылдарда өрт резервуарларын кожууннуң арткан сумуларынга тургузары планнаттынган. Ук ажылдарны хүлээникчи – хууда сайгарлыкчы Анзор Андриасян кылып турар.
